ଭୁବନେଶ୍ୱର: ଓଡ଼ିଶାର ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଗୁରୁବାର ଭାରତରେ ସିଙ୍ଗାପୁରର ହାଇକମିଶନର ସାଇମନ ୱଙ୍ଗଙ୍କ ସହ ଲୋକସେବା ଭବନରେ ଏକ ଫଳପ୍ରଦ ବୈଠକ କରିଥିଲେ । ଏହି ବୈଠକରେ ଓଡ଼ିଶା ଓ ସିଙ୍ଗାପୁର ମଧ୍ୟରେ ଆର୍ଥିକ, ପ୍ରଯୁକ୍ତିଗତ ଓ ପ୍ରତିଷ୍ଠାନଗତ ସହଯୋଗକୁ ଆହୁରି ମଜବୁତ କରିବା ଉପରେ ଗୁରୁତ୍ୱ ଦିଆଯାଇଥିଲା ।
ବୈଠକ ସମୟରେ ଉଭୟ ପକ୍ଷ ସହର ବିକାଶ, ଗ୍ରୀନ ଏନର୍ଜି, ବନ୍ଦର ଭିତ୍ତିଭୂମି, ପ୍ରଯୁକ୍ତି, ନବୋନ୍ମେଷ ଏବଂ କୌଶଳ ବିକାଶ ପରି ଗୁରୁତ୍ୱପୂର୍ଣ୍ଣ କ୍ଷେତ୍ରରେ ସହଯୋଗ ବୃଦ୍ଧି ନେଇ ବିସ୍ତୃତ ଆଲୋଚନା କରିଥିଲେ । ମୁଖ୍ୟମନ୍ତ୍ରୀ କହିଥିଲେ ଯେ, ଓଡ଼ିଶା ‘ସମୃଦ୍ଧ ଓଡ଼ିଶା-୨୦୩୬’ ଓ ‘ବିକଶିତ ଭାରତ-୨୦୪୭’ ଲକ୍ଷ୍ୟ ପୂରଣ ଦିଗରେ ଆଗେଇ ଯାଉଥିବା ବେଳେ ସିଙ୍ଗାପୁର ଏକ ସ୍ୱାଭାବିକ ଏବଂ ବିଶ୍ୱସନୀୟ ବିକାଶ ସହଭାଗୀ ଭାବେ ଉଭା ହୋଇଛି ।
ମୁଖ୍ୟମନ୍ତ୍ରୀ ବିଶେଷ ଭାବରେ ସିଙ୍ଗାପୁର ରାଷ୍ଟ୍ରପତି Tharman Shanmugaratnamଙ୍କ ଓଡ଼ିଶା ଗସ୍ତ ସମୟରେ ସ୍ୱାକ୍ଷରିତ ଆଠଟି ଗୁରୁତ୍ୱପୂର୍ଣ୍ଣ ବୁଝାମଣା ଚୁକ୍ତି (MoU)ର ଶୀଘ୍ର କାର୍ଯ୍ୟକାରିତା ଉପରେ ଜୋର ଦେଇଥିଲେ । ଏହି ଚୁକ୍ତିଗୁଡ଼ିକର ସଫଳ ରୂପାୟନ ଏବଂ ସିଙ୍ଗାପୁରୀ ନିବେଶକଙ୍କ ପ୍ରସ୍ତାବକୁ ତ୍ୱରିତ ଅଗ୍ରଗତି ଦେବା ପାଇଁ ଏକ “Structured Engagement Mechanism” ଗଠନ କରିବାକୁ ମଧ୍ୟ ପ୍ରସ୍ତାବ ଦିଆଯାଇଥିଲା ।
ମୋହନ ମାଝୀ କହିଥିଲେ ଯେ, ସିଙ୍ଗାପୁରର ସହର ଯୋଜନା, ସ୍ୱଚ୍ଛ ଶକ୍ତି, ବନ୍ଦର ପରିଚାଳନା ଓ ପ୍ରଯୁକ୍ତି କ୍ଷେତ୍ରର ଅନୁଭବ ଓଡ଼ିଶାର ଭବିଷ୍ୟତ ବିକାଶ ପାଇଁ ବହୁତ ଉପକାରୀ ହେବ । ରାଜ୍ୟ ସରକାର ନିବେଶକମାନଙ୍କୁ ସିଙ୍ଗଲ୍ ୱିଣ୍ଡୋ ସୁବିଧା ଓ ତ୍ୱରିତ ଅନୁମୋଦନ ପ୍ରଦାନ କରିବାକୁ ପ୍ରତିବଦ୍ଧ ବୋଲି ସେ ଆଶ୍ୱାସନା ଦେଇଥିଲେ ।
ଏହା ସହିତ ସିଙ୍ଗାପୁରର ବ୍ୟବସାୟିକ ପ୍ରତିନିଧି ଦଳକୁ ଓଡ଼ିଶା ଗସ୍ତ ପାଇଁ ଆମନ୍ତ୍ରଣ କରାଯାଇଥିଲା, ଯାହା ମାଧ୍ୟମରେ ଗ୍ରୀନ ଏନର୍ଜି, ନଗର ଉନ୍ନୟନ, ଫିନଟେକ୍, ଇନସୁରଟେକ୍ ଏବଂ କୌଶଳ ବିକାଶ କ୍ଷେତ୍ରରେ ନୂତନ ନିବେଶ ସୁଯୋଗ ସୃଷ୍ଟି ହେବ । ଅନ୍ୟପକ୍ଷରେ ସାଇମନ ୱଙ୍ଗ ମୁଖ୍ୟମନ୍ତ୍ରୀଙ୍କୁ ତାଙ୍କ ସରକାରର ଦୁଇ ବର୍ଷ ପୂର୍ତ୍ତି ଅବସରରେ ଅଭିନନ୍ଦନ ଜଣାଇବା ସହ ଓଡ଼ିଶାର ବିକାଶ ଯାତ୍ରାରେ ସିଙ୍ଗାପୁରର ପୂର୍ଣ୍ଣ ସହଯୋଗ ଜାରି ରହିବ ବୋଲି କହିଥିଲେ ।
ଭାରତ ଓ ସିଙ୍ଗାପୁର ମଧ୍ୟରେ ବର୍ତ୍ତମାନ ବ୍ୟାପକ କୌଶଳଗତ ସହଭାଗିତା ରହିଛି ଏବଂ ଓଡ଼ିଶା-ସିଙ୍ଗାପୁର ସହଯୋଗ ଆଗାମୀ ଦିନରେ ରାଜ୍ୟର ଶିଳ୍ପ, ପ୍ରଯୁକ୍ତି ଓ ନିବେଶ କ୍ଷେତ୍ରରେ ନୂଆ ଅଧ୍ୟାୟ ରଚନା କରିବ ବୋଲି ଆଶା କରାଯାଉଛି ।
