ପଶ୍ଚିମ ଏସିଆରେ ଚାଲିଥିବା ଅସ୍ଥିର ପରିସ୍ଥିତି ମଧ୍ୟରେ ଏକପଟେ ଶାନ୍ତି ପ୍ରୟାସ ଆଗକୁ ବଢ଼ିଥିବା ବେଳେ ଅନ୍ୟପଟେ ସାମରିକ ଉତ୍ତେଜନା ପୁଣି ବଢ଼ିଯାଇଛି । ଆମେରିକାର ମଧ୍ୟସ୍ଥତାରେ ଲେବାନନ, ଇସ୍ରାଏଲ ଓ ଆମେରିକା ମଧ୍ୟରେ ଏକ ତ୍ରିପକ୍ଷୀୟ ଫ୍ରେମୱର୍କ ଚୁକ୍ତି ସ୍ୱାକ୍ଷର ହୋଇଛି । ଏହି ଚୁକ୍ତିର ଲକ୍ଷ୍ୟ ଦକ୍ଷିଣ ଲେବାନନରେ ହିଂସା କମାଇବା, ଦୀର୍ଘସ୍ଥାୟୀ ବନ୍ଦୁକବିରତିକୁ ଆଗେଇ ନେବା ଏବଂ ସୀମା ଅଞ୍ଚଳରେ ସ୍ଥିରତା ଫେରାଇବା ।
ଚୁକ୍ତି ଅନୁଯାୟୀ, ହିଜବୁଲ୍ଲାର ନିରସ୍ତ୍ରୀକରଣ ପ୍ରକ୍ରିୟା ଆଗକୁ ବଢ଼ାଇବା, ଦକ୍ଷିଣ ଲେବାନନରେ ଲେବାନନ ସେନାର ନିୟନ୍ତ୍ରଣ ବଢ଼ାଇବା ଏବଂ ପରିସ୍ଥିତି ସ୍ୱାଭାବିକ ହେବା ପରେ ଇସ୍ରାଏଲୀ ସେନାର ପର୍ଯ୍ୟାୟକ୍ରମେ ପ୍ରତ୍ୟାହାର ଉପରେ ଜୋର ଦିଆଯାଇଛି । ତେବେ ହିଜବୁଲ୍ଲା ଏହି ଚୁକ୍ତିକୁ ବିରୋଧ କରି ଏହା ଲେବାନନ ଭିତରେ ଅଧିକ ବିଭାଜନ ସୃଷ୍ଟି କରିପାରେ ବୋଲି କହିଛି ।
ଏହାରି ମଧ୍ୟରେ ଆମେରିକା-ଇରାନ ମଧ୍ୟରେ ଉତ୍ତେଜନା ପୁଣି ଚରମରେ ପହଞ୍ଚିଛି । ଆମେରିକା ପକ୍ଷରୁ ଇରାନର ମିସାଇଲ, ଡ୍ରୋନ ଭଣ୍ଡାର ଓ ରାଡାର କେନ୍ଦ୍ର ଉପରେ ସାମରିକ ଆକ୍ରମଣ କରାଯିବା ପରେ ଇରାନର ଇସ୍ଲାମିକ ରିଭଲ୍ୟୁସନାରୀ ଗାର୍ଡ କର୍ପ୍ସ (IRGC)ଦାବି କରିଛି ଯେ ସେମାନେ ଗଲ୍ଫ ଅଞ୍ଚଳରେ ଥିବା ଆମେରିକୀୟ ସାମରିକ ସ୍ଥାନଗୁଡ଼ିକୁ ପାଲଟା ଆକ୍ରମଣ କରିଛନ୍ତି । ଯଦିଓ କେଉଁ ସ୍ଥାନକୁ ଟାର୍ଗେଟ କରାଯାଇଛି ସେନେଇ ବିସ୍ତୃତ ସୂଚନା ଦିଆଯାଇନାହିଁ ।
ଆମେରିକା କହିଛି, ହର୍ମୁଜ୍ ପ୍ରଣାଳୀ ଦେଇ ଯାଉଥିବା ଏକ ବାଣିଜ୍ୟିକ ଜାହାଜ ଉପରେ ଡ୍ରୋନ ଆକ୍ରମଣ ପରେ ଏହି ପ୍ରତିଆକ୍ରମଣ କରାଯାଇଥିଲା । ୱାଶିଂଟନର ଅଭିଯୋଗ ଅନୁଯାୟୀ, ଏହା ପୂର୍ବରୁ ହୋଇଥିବା ଯୁଦ୍ଧବିରତିର ଉଲ୍ଲଂଘନ । ଅନ୍ୟପଟେ ତେହରାନ ଏହି ଅଭିଯୋଗକୁ ଅସ୍ୱୀକାର କରି କହିଛି ଯେ ହର୍ମୁଜ୍ ପ୍ରଣାଳୀରେ ସୁରକ୍ଷା ଓ ନୌ-ଚଳାଚଳ ନିୟନ୍ତ୍ରଣ କରିବାର ଅଧିକାର ତାହାର ରହିଛି ।
ବିଶ୍ଳେଷକଙ୍କ ମତରେ, ଲେବାନନ-ଇସ୍ରାଏଲ ଶାନ୍ତି ପ୍ରକ୍ରିୟା ଆରମ୍ଭ ହୋଇଥିଲେ ମଧ୍ୟ ଆମେରିକା-ଇରାନ ସାମରିକ ସଂଘର୍ଷ ଏହି ଅଞ୍ଚଳର ସୁରକ୍ଷା ଓ ବିଶ୍ୱ ତୈଳ ବଜାର ଉପରେ ନୂଆ ଅନିଶ୍ଚିତତା ସୃଷ୍ଟି କରିଛି । ଯଦି ଉଭୟ ପକ୍ଷ ପୁଣି ସାମରିକ କାର୍ଯ୍ୟକଳାପ ବଢ଼ାନ୍ତି, ତେବେ ପଶ୍ଚିମ ଏସିଆର ପରିସ୍ଥିତି ଆହୁରି ଜଟିଳ ହୋଇପାରେ ।
