ରାଷ୍ଟ୍ରୀୟ ସୁରକ୍ଷା ସହ ଜଡିତ ଏକ ଗୁରୁତ୍ୱପୂର୍ଣ୍ଣ ଗୁପ୍ତଚରବୃତ୍ତି ମାମଲାରେ ରାଜସ୍ଥାନର ଜଣେ ଚା’ ଦୋକାନୀ ମୁଶ୍ତାକ ଅଲିଙ୍କୁ ସୁରକ୍ଷା ଏଜେନ୍ସି ଗିରଫ କରିଛି । ପ୍ରାଥମିକ ତଦନ୍ତରେ ଜଣାପଡ଼ିଛି ଯେ, ୨୬ ବର୍ଷୀୟ ମୁଶ୍ତାକ ଗତ ଦୁଇ ବର୍ଷ ଧରି ପାକିସ୍ତାନର ଆଇଏସଆଇ (ISI) ସହ ସଂପୃକ୍ତ ହ୍ୟାଣ୍ଡଲରମାନଙ୍କ ସହ ଯୋଗାଯୋଗରେ ଥିଲେ । ସେ ନିଜ ଚା’ ଦୋକାନକୁ ଆଡ଼ ଭାବେ ବ୍ୟବହାର କରି ସାମରିକ ଏବଂ ସଂବେଦନଶୀଳ ଅଞ୍ଚଳ ସମ୍ପର୍କିତ ସୂଚନା ସଂଗ୍ରହ କରୁଥିବା ଅଭିଯୋଗ ହୋଇଛି ।
ତଦନ୍ତକାରୀ ସଂସ୍ଥାମାନଙ୍କ କହିବା ଅନୁସାରେ, ମୁଶ୍ତାକ ଗୁଗୁଲ୍ ମ୍ୟାପ୍ସ ବ୍ୟବହାର କରି ସଂବେଦନଶୀଳ ସ୍ଥାନଗୁଡ଼ିକର ଲୋକେସନ୍ ଚିହ୍ନଟ କରୁଥିଲେ ଏବଂ ସେଠାର ଫଟୋ ଓ ଭିଡିଓ ପାକିସ୍ତାନୀ ହ୍ୟାଣ୍ଡଲରମାନଙ୍କୁ ପଠାଉଥିଲେ । ଏହା ସହିତ ସେ ନିଜ ଚା’ ଦୋକାନରେ ଇଣ୍ଟରନେଟ୍ ସଂଯୁକ୍ତ କ୍ୟାମେରା ସ୍ଥାପନ କରି ଲାଇଭ୍ ଫିଡ୍ ପାକିସ୍ତାନକୁ ପଠାଇବା ଯୋଜନାରେ ଥିଲେ । ଏହି କ୍ୟାମେରାଗୁଡ଼ିକ ମାଧ୍ୟମରେ ସେନା ଯାତାୟାତ, ସୁରକ୍ଷା ବଳର ଗତିବିଧି ଓ ଅନ୍ୟାନ୍ୟ ରଣନୀତିକ ସୂଚନା ରିଅଲ୍-ଟାଇମ୍ରେ ପଠାଇବା ଉଦ୍ଦେଶ୍ୟ ଥିବା ଅନୁମାନ କରାଯାଉଛି ।
ସୁରକ୍ଷା ଏଜେନ୍ସିମାନଙ୍କ ଅନୁସାରେ, ନିକଟ ଅତୀତରେ ଉତ୍ତର ଭାରତରେ ଅନେକ ଗୁପ୍ତଚର ଚକ୍ର ଧରାପଡ଼ିଛି ଯେଉଁଥିରେ ଚୀନ୍ ନିର୍ମିତ 4G ଓ ସୋଲାର୍ ଚାଳିତ CCTV କ୍ୟାମେରା ବ୍ୟବହାର କରାଯାଉଥିଲା । ଏହି କ୍ୟାମେରାଗୁଡ଼ିକ ସିମ୍ କାର୍ଡ ଏବଂ ମୋବାଇଲ୍ ଆପ୍ ମାଧ୍ୟମରେ ସିଧାସଳଖ ଲାଇଭ୍ ଭିଡିଓ ଫିଡ୍ ବିଦେଶରୁ ଦେଖିବା ସୁବିଧା ଦେଇଥାଏ । ଏହି ପ୍ରଯୁକ୍ତିକୁ ପାକିସ୍ତାନୀ ହ୍ୟାଣ୍ଡଲରମାନେ ଭାରତର ସଂବେଦନଶୀଳ ସ୍ଥାନ ଉପରେ ନଜର ରଖିବା ପାଇଁ ବ୍ୟବହାର କରୁଥିବା ତଦନ୍ତରେ ଜଣାପଡ଼ିଛି ।
ପୂର୍ବରୁ ପଞ୍ଜାବର ପଠାନକୋଟ ଓ କପୁରଥଲାରେ ମଧ୍ୟ ଏପରି ଗୁପ୍ତଚର ଧରାପଡ଼ିଥିଲା । ସେଠାରେ ଅଭିଯୁକ୍ତମାନେ ରାଷ୍ଟ୍ରୀୟ ରାଜପଥ ନିକଟରେ ଦୋକାନ ଓ ଘରରେ CCTV କ୍ୟାମେରା ଲଗାଇ ସେନା ଓ ଅର୍ଦ୍ଧସାମରିକ ବଳର ଗତିବିଧିର ଲାଇଭ୍ ଫିଡ୍ ପାକିସ୍ତାନକୁ ପଠାଉଥିବା ଅଭିଯୋଗ ହୋଇଥିଲା ।
ବର୍ତ୍ତମାନ ମୁଶ୍ତାକ ଅଲିଙ୍କ ମୋବାଇଲ୍ ଫୋନ୍, ଡିଜିଟାଲ୍ ଡିଭାଇସ୍ ଓ ସୋସିଆଲ୍ ମିଡିଆ ଆକାଉଣ୍ଟର ଫରେନସିକ୍ ଯାଞ୍ଚ ଚାଲିଛି । ତାଙ୍କ ସହ ଆଉ କେହି ଜଡିତ ଅଛନ୍ତି କି ନାହିଁ ଏବଂ କେତେ ସୂଚନା ପାକିସ୍ତାନକୁ ପଠାଯାଇଛି ତାହା ଖୋଜାଯାଉଛି । ସୁରକ୍ଷା ଏଜେନ୍ସିମାନେ ଏହି ମାମଲାକୁ ଜାତୀୟ ସୁରକ୍ଷା ପାଇଁ ଗମ୍ଭୀର ଭାବେ ଦେଖୁଛନ୍ତି ।
