ଓଡ଼ିଶା: ସରକାରୀ ସ୍ୱାସ୍ଥ୍ୟ ସେବାକୁ ଅଧିକ ସକ୍ରିୟ, ଦାୟିତ୍ୱଶୀଳ ଓ ଜନମୁଖୀ କରିବା ଲକ୍ଷ୍ୟରେ ମୁଖ୍ୟମନ୍ତ୍ରୀ Mohan Charana Majhi ଏକ ବଡ଼ ନିଷ୍ପତ୍ତି ନେଇଛନ୍ତି। ଦୀର୍ଘ ସମୟ ଧରି ବିନା ଅନୁମତିରେ ଅନୁପସ୍ଥିତ ରହିଥିବା ୧୨୮ ଜଣ ମେଡିକାଲ ଅଫିସର ଏବଂ ଡେଣ୍ଟାଲ ସର୍ଜନଙ୍କ ବିରୋଧରେ ବିଭାଗୀୟ ଶୃଙ୍ଖଳାଗତ କାର୍ଯ୍ୟାନୁଷ୍ଠାନ ଆରମ୍ଭ କରିବାକୁ ସେ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗକୁ ନିର୍ଦ୍ଦେଶ ଦେଇଛନ୍ତି।
ସରକାରୀ ସୂଚନା ଅନୁସାରେ, ଏହି ୧୨୮ ଜଣ ଡାକ୍ତର ଓ ଦନ୍ତ ଚିକିତ୍ସକ ପାଞ୍ଚ ବର୍ଷରୁ ଅଧିକ ସମୟ ଧରି ବିନା ଅନୁମତିରେ ନିଜ କାର୍ଯ୍ୟସ୍ଥଳରୁ ଅନୁପସ୍ଥିତ ରହିଥିଲେ। ସେମାନଙ୍କ ଅନୁପସ୍ଥିତି ଫଳରେ ବିଶେଷକରି ଗ୍ରାମାଞ୍ଚଳ ଓ ଦୂରଦୂରାନ୍ତର ସରକାରୀ ହସ୍ପିଟାଲଗୁଡ଼ିକରେ ସ୍ୱାସ୍ଥ୍ୟ ସେବା ବ୍ୟାହତ ହୋଇଥିଲା। ପୂର୍ବରୁ ସରକାର ପକ୍ଷରୁ ଖବରକାଗଜରେ ବିଜ୍ଞପ୍ତି ପ୍ରକାଶ କରାଯାଇ ସେମାନଙ୍କୁ କାର୍ଯ୍ୟରେ ଯୋଗଦେବା ଓ ସ୍ଥିତି ସ୍ପଷ୍ଟ କରିବାକୁ କୁହାଯାଇଥିଲା। କିନ୍ତୁ ଅନେକ ଡାକ୍ତର ଏହାର କୌଣସି ଉତ୍ତର ଦେଇନଥିଲେ।
ଏହି ପରିପ୍ରେକ୍ଷୀରେ ମୁଖ୍ୟମନ୍ତ୍ରୀ କଡ଼ା ମନୋଭାବ ପ୍ରଦର୍ଶନ କରି ଶୃଙ୍ଖଳାଗତ ପଦକ୍ଷେପ ନେବାକୁ କହିଛନ୍ତି। ତାଙ୍କ ମତରେ ସରକାରୀ ଡାକ୍ତରଙ୍କ ଦାୟିତ୍ୱ ହେଉଛି ରୋଗୀଙ୍କୁ ଉଚିତ ସେବା ଯୋଗାଇବା। ଦୀର୍ଘ ସମୟ ଧରି କାର୍ଯ୍ୟରୁ ଦୂରେଇ ରହିବା ରୋଗୀ ସେବା ଓ ସ୍ୱାସ୍ଥ୍ୟ ବ୍ୟବସ୍ଥା ପ୍ରତି ଅବହେଳା ବୋଲି ଗଣାଯିବ।
ଏହା ସହିତ ଆଉ ଏକ ଗୁରୁତ୍ୱପୂର୍ଣ୍ଣ ମାମଲାରେ କନ୍ଧମାଳ ପୋଲିସ ହସ୍ପିଟାଲର ପୂର୍ବତନ ମେଡିକାଲ ଅଫିସର ଡା. ବିଚକ୍ଷଣା ପାଣିଗ୍ରାହୀଙ୍କୁ ସରକାରୀ ଚାକିରିରୁ ବରଖାସ୍ତ କରାଯାଇଛି। ସେ ୨୦୧୨ ମସିହାରୁ ବିନା ଅନୁମତିରେ ଅନୁପସ୍ଥିତ ଥିଲେ। ବାରମ୍ବାର ନୋଟିସ ଜାରି କରାଯାଇଥିଲେ ମଧ୍ୟ ସେ କାର୍ଯ୍ୟରେ ଯୋଗ ଦେଇନଥିଲେ। ଏହାକୁ ଗୁରୁତର ଅବହେଳା ଭାବେ ବିବେଚନା କରି ସରକାର ତାଙ୍କୁ ସେବାରୁ ହଟାଇ ଦେଇଛନ୍ତି।
ମୁଖ୍ୟମନ୍ତ୍ରୀ ମାଝୀ ଏହି ଅବସରରେ କହିଛନ୍ତି ଯେ ରାଜ୍ୟ ସରକାର ସ୍ୱାସ୍ଥ୍ୟ କ୍ଷେତ୍ରରେ ବ୍ୟାପକ ବିନିଯୋଗ କରୁଛନ୍ତି। ନୂତନ ହସ୍ପିଟାଲ ନିର୍ମାଣ, ପୁରୁଣା ଚିକିତ୍ସାଳୟର ଆଧୁନିକୀକରଣ, ନୂତନ ମେଡିକାଲ କଲେଜ ସ୍ଥାପନ ଏବଂ ଚିକିତ୍ସା ଶିକ୍ଷାର ବିସ୍ତାର ଉପରେ ସରକାର ବିଶେଷ ଗୁରୁତ୍ୱ ଦେଉଛନ୍ତି। ଏପରି ସମୟରେ ଡାକ୍ତରମାନଙ୍କ ଅନୁପସ୍ଥିତିକୁ କୌଣସି ପରିସ୍ଥିତିରେ ବରଦାସ୍ତ କରାଯିବ ନାହିଁ ବୋଲି ସେ ସ୍ପଷ୍ଟ କରିଛନ୍ତି।
