ନୂଆଦିଲ୍ଲୀ: ଇଟାଲୀର ମୋଣ୍ଟେସିଲଭାନୋରେ ଆୟୋଜିତ FIDE World Youth Chess Championship 2026ରେ ଭାରତର ଯୁବ ଚେସ୍ ଖେଳାଳି ପ୍ରତୀତି ବରଦୋଲୋଇ ଇତିହାସ ରଚିଛନ୍ତି। ମାତ୍ର ୧୩ ବର୍ଷ ବୟସରେ ସେ ଗାର୍ଲ୍ସ ଅଣ୍ଡର-18 ବିଭାଗରେ ରୌପ୍ୟ ପଦକ ଜିତି ଭାରତ ପାଇଁ ଏକମାତ୍ର ପଦକ ଆଣିଛନ୍ତି।
ପ୍ରତୀତି କେବଳ ଜଣେ ଦକ୍ଷ ଚେସ୍ ଖେଳାଳି ନୁହଁନ୍ତି, ସେ ଜଣେ ଗଣିତ ଅଲିମ୍ପିଆଡ୍ ପ୍ରତିଭା ମଧ୍ୟ। ତାଙ୍କର ଯୁକ୍ତିପୂର୍ଣ୍ଣ ଚିନ୍ତାଧାରା ଏବଂ ସ୍ୱାଧୀନ ନିଷ୍ପତ୍ତି ନେବାର କ୍ଷମତା ତାଙ୍କୁ ଅନ୍ୟ ଖେଳାଳିଙ୍କଠାରୁ ଅଲଗା ପରିଚୟ ଦେଇଛି। ତାଙ୍କ କୋଚଙ୍କ ମତରେ, ସେ କେବଳ ଓପେନିଂ ମନେରଖି ଖେଳନ୍ତି ନାହିଁ, ବରଂ ପ୍ରତ୍ୟେକ ସ୍ଥିତିକୁ ନିଜେ ବିଶ୍ଳେଷଣ କରି ଚାଲ ଚୟନ କରନ୍ତି।
ଏହି ସଫଳତାର ଆଉ ଏକ ରୋଚକ ଦିଗ ହେଉଛି, ପ୍ରତୀତିଙ୍କ ଜନ୍ମ ବିଶ୍ୱ ଚେସ୍ କିମ୍ବଦନ୍ତୀ ଗ୍ୟାରି କାସ୍ପାରୋଭଙ୍କ ଜନ୍ମର ଠିକ୍ ୫୦ ବର୍ଷ ପରେ ହୋଇଥିଲା। ଏହି ସଂଯୋଗକୁ ନେଇ ଚେସ୍ ଜଗତରେ ବେଶ ଚର୍ଚ୍ଚା ହେଉଛି।
ପ୍ରତିଯୋଗିତାରେ ୮୩ଟି ଦେଶର ୭୫୮ରୁ ଅଧିକ ଖେଳାଳି ଅଂଶଗ୍ରହଣ କରିଥିଲେ। କଠିନ ପ୍ରତିଦ୍ୱନ୍ଦ୍ୱିତା ମଧ୍ୟରେ ପ୍ରତୀତିଙ୍କ ସ୍ଥିର ପ୍ରଦର୍ଶନ ତାଙ୍କୁ ରୌପ୍ୟ ପଦକ ପର୍ଯ୍ୟନ୍ତ ପହଞ୍ଚାଇଥିଲା। ତାଙ୍କର ଆନ୍ତର୍ଜାତୀୟ ପ୍ରଦର୍ଶନ ରେଟିଂ ମଧ୍ୟ ୨୪୧୫ ରହିଥିଲା, ଯାହା ତାଙ୍କର ଉଚ୍ଚସ୍ତରୀୟ ଖେଳକୁ ପ୍ରମାଣ କରେ।
ଚେସ୍ ବିଶେଷଜ୍ଞମାନଙ୍କ ମତରେ, ପ୍ରତୀତୀ ବରଦୋଲୋଇ ଭାରତୀୟ ଚେସ୍ର ଆଗାମୀ ପିଢ଼ିର ସବୁଠାରୁ ଉଜ୍ଜ୍ୱଳ ପ୍ରତିଭାମାନଙ୍କ ମଧ୍ୟରୁ ଜଣେ ଏବଂ ଭବିଷ୍ୟତରେ ଗ୍ରାଣ୍ଡମାଷ୍ଟର ହେବାର ସମ୍ଭାବନା ରହିଛି।
