ନୂଆଦିଲ୍ଲୀ, ୨୮ ଜୁଲାଇ; ତତ୍କାଳ ଟିକେଟ ବୁକିଂକୁ ଅଧିକ ସୁବ୍ୟବସ୍ଥିତ, ସ୍ୱଚ୍ଛ ଓ ଯାତ୍ରୀ-ବନ୍ଧବ କରିବା ପାଇଁ ଭାରତୀୟ ରେଳ ଏକ ନୂଆ ପଦକ୍ଷେପ ନେଇଛି। ପଶ୍ଚିମ ମଧ୍ୟ ରେଳ (West Central Railway) ଅଧୀନସ୍ଥ ସମସ୍ତ ରିଜର୍ଭେସନ୍ କାଉଣ୍ଟରରେ ୧ ଅଗଷ୍ଟ ୨୦୨୬ ଠାରୁ ତତ୍କାଳ ଟିକେଟ ବୁକିଂ ପାଇଁ ଟୋକେନ୍ ସିଷ୍ଟମ୍ ଲାଗୁ ହେବ। ଏହି ବ୍ୟବସ୍ଥାର ଉଦ୍ଦେଶ୍ୟ ହେଉଛି କାଉଣ୍ଟର ସାମ୍ନାରେ ହେଉଥିବା ଅତ୍ୟଧିକ ଭିଡ଼କୁ ନିୟନ୍ତ୍ରଣ କରିବା, ଲାଇନ୍ ପରିଚାଳନାକୁ ସହଜ କରିବା ଏବଂ ପ୍ରକୃତ ଯାତ୍ରୀଙ୍କୁ ସମାନ ସୁଯୋଗ ଦେବା।
ନୂଆ ବ୍ୟବସ୍ଥା ଅନୁଯାୟୀ, ଏସି ତତ୍କାଳ ଟିକେଟ ପାଇଁ ସକାଳ ୯:୦୦ରୁ ୯:୨୫ ମଧ୍ୟରେ ଟୋକେନ୍ ବଣ୍ଟନ କରାଯିବ। ସେହିପରି ସ୍ଲିପର ଶ୍ରେଣୀ ପାଇଁ ସକାଳ ୯:୩୦ରୁ ୯:୫୫ ପର୍ଯ୍ୟନ୍ତ ଟୋକେନ୍ ଦିଆଯିବ। ତତ୍କାଳ ବୁକିଂ ଆରମ୍ଭ ହେବା ପରେ କାଉଣ୍ଟରରେ ଯାତ୍ରୀଙ୍କୁ ଟୋକେନ୍ ନମ୍ବର ଅନୁଯାୟୀ ଡାକି ଟିକେଟ ବୁକ୍ କରାଯିବ। ଏହା ଫଳରେ ଘଣ୍ଟା ଘଣ୍ଟା ଧରି ଲାଇନ୍ରେ ଠିଆ ହୋଇ ରହିବାର ଆବଶ୍ୟକତା କମିଯିବ।
ରେଳ ଅଧିକାରୀମାନଙ୍କ କହିବା ଅନୁଯାୟୀ, ଏହି ଟୋକେନ୍ ବ୍ୟବସ୍ଥା ଦ୍ୱାରା ଅନିୟମିତତା ଓ ଧକ୍କାମୁକ୍କି କମିବା ସହ କାଉଣ୍ଟରରେ ସ୍ୱଚ୍ଛତା ବଢ଼ିବ। ବିଶେଷକରି ତତ୍କାଳ ବୁକିଂ ସମୟରେ ଦେଖାଯାଉଥିବା ଅବ୍ୟବସ୍ଥା ଓ ଦଲାଲଙ୍କ ପ୍ରଭାବ ହ୍ରାସ ପାଇବ ବୋଲି ଆଶା କରାଯାଉଛି। ଯାତ୍ରୀମାନେ ମଧ୍ୟ ନିଜ ଟୋକେନ୍ କ୍ରମ ସମ୍ପର୍କରେ ସ୍ପଷ୍ଟ ଧାରଣା ପାଇପାରିବେ।
ଏହି ପଦକ୍ଷେପ ଭାରତୀୟ ରେଳ ପକ୍ଷରୁ ତତ୍କାଳ ବୁକିଂ ବ୍ୟବସ୍ଥାରେ ଆଣାଯାଇଥିବା ସମ୍ପ୍ରତିର ସଂସ୍କାରମାନଙ୍କର ଏକ ଅଂଶ। ଏହା ପୂର୍ବରୁ ଅନଲାଇନ୍ ତତ୍କାଳ ବୁକିଂ ପାଇଁ ଆଧାର ପ୍ରମାଣୀକରଣ, OTP ଯାଞ୍ଚ ଏବଂ ଆରମ୍ଭର ପ୍ରଥମ ୩୦ ମିନିଟ୍ରେ ଅନୁମୋଦିତ ଏଜେଣ୍ଟଙ୍କ ବୁକିଂ ଉପରେ କଟକଣା ଲାଗୁ କରାଯାଇଥିଲା। ନୂଆ ଟୋକେନ୍ ସିଷ୍ଟମ୍ ସେହି ସଂସ୍କାରକୁ ଆହୁରି ମଜବୁତ କରିବ।
ଫିଲହାଲ ଏହି ବ୍ୟବସ୍ଥା ପଶ୍ଚିମ ମଧ୍ୟ ରେଳର କୋଟା ଡିଭିଜନରେ ଲାଗୁ ହେଉଛି। ଏହାର ସଫଳତା ଆଧାରରେ ଭବିଷ୍ୟତରେ ଅନ୍ୟ ରେଳ ଜୋନ୍ଗୁଡ଼ିକରେ ମଧ୍ୟ ଏହି ବ୍ୟବସ୍ଥାକୁ ବିସ୍ତାର କରାଯାଇପାରେ।
