ଭୁବନେଶ୍ୱର, ୧୦ ଅଗଷ୍ଟ; ଓଡ଼ିଶାର ଯୁବପିଢ଼ିଙ୍କ ପାଇଁ ଆସିଛି ବଡ଼ ନିଯୁକ୍ତି ସୁଯୋଗ। ଭୁବନେଶ୍ୱରସ୍ଥିତ ରେଳ ଅଡିଟୋରିୟମରେ ସୋମବାର ଆୟୋଜିତ ନିଯୁକ୍ତି ମେଳାରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ୯ଟି ରାଜ୍ୟ ସରକାରୀ ବିଭାଗର ୧୩୨୬ ଜଣ ମନୋନୀତ ପ୍ରାର୍ଥୀଙ୍କୁ ନିଯୁକ୍ତିପତ୍ର ପ୍ରଦାନ କରିଛନ୍ତି।
ନିଯୁକ୍ତିରେ ସର୍ବାଧିକ ଅଂଶ ରହିଛି ଗୃହ ଓ ନଗର ଉନ୍ନୟନ ବିଭାଗର। ଏହି ବିଭାଗରେ ୩୬୪ ଜଣଙ୍କୁ ନିଯୁକ୍ତିପତ୍ର ମିଳିଛି। ଏହା ପରେ ପଞ୍ଚାୟତିରାଜ ଓ ପାନୀୟ ଜଳ ବିଭାଗରେ ୩୬୧ ଜଣ ଏବଂ ଶକ୍ତି ବିଭାଗରେ ୨୪୦ ଜଣଙ୍କୁ ନିଯୁକ୍ତି ମିଳିଛି।
ସେହିପରି କୃଷି ଓ କୃଷକ ସଶକ୍ତୀକରଣ ବିଭାଗରେ ୧୧୮ ଜଣ ଏବଂ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗରେ ୧୧୧ ଜଣ ନିଯୁକ୍ତିପତ୍ର ପାଇଛନ୍ତି। ମତ୍ସ୍ୟ ଓ ପଶୁ ସମ୍ପଦ ବିକାଶ ବିଭାଗରେ ୮୬ ଜଣ ଏବଂ କ୍ରୀଡ଼ା ଓ ଯୁବ ସେବା ବିଭାଗରେ ୨୬ ଜଣଙ୍କୁ ନିଯୁକ୍ତି ଦିଆଯାଇଛି।
ଏହାବ୍ୟତୀତ ଦକ୍ଷତା ବିକାଶ ଓ ବୈଷୟିକ ଶିକ୍ଷା ବିଭାଗ ଏବଂ ଅବକାରୀ ବିଭାଗରେ ୧୦ ଜଣ ଲେଖାଏଁ ନିଯୁକ୍ତି ପାଇଛନ୍ତି। ଏହି ନିଯୁକ୍ତି ମେଳା ମାଧ୍ୟମରେ ବିଭିନ୍ନ ବିଭାଗରେ ସରକାରୀ ସେବା ପାଇଁ ଚୟନ ହୋଇଥିବା ଯୁବକ-ଯୁବତୀଙ୍କୁ ଔପଚାରିକ ଭାବେ ନିଯୁକ୍ତିପତ୍ର ହସ୍ତାନ୍ତର କରାଯାଇଛି।
ମୁଖ୍ୟମନ୍ତ୍ରୀ ମାଝୀ କହିଛନ୍ତି ଯେ ଏହା ୧୬ତମ ନିଯୁକ୍ତି ମେଳା। ୨୦୨୪ରୁ ଏପର୍ଯ୍ୟନ୍ତ ୧୬ଟି ନିଯୁକ୍ତି ମେଳା ମାଧ୍ୟମରେ ପ୍ରାୟ ୪୫,୪୦୮ ଜଣ ଯୋଗ୍ୟ ଯୁବକ-ଯୁବତୀଙ୍କୁ ନିଯୁକ୍ତି ଦିଆଯାଇଥିବା ସେ ସୂଚନା ଦେଇଛନ୍ତି। ଯୁବବର୍ଗଙ୍କୁ ରୋଜଗାର ଦେବା ସହ ପ୍ରଶାସନିକ ବ୍ୟବସ୍ଥାକୁ ମଜବୁତ କରିବା ଏହି ପଦକ୍ଷେପର ଲକ୍ଷ୍ୟ ବୋଲି ସେ କହିଛନ୍ତି।
ସରକାରୀ ନିଯୁକ୍ତି ପାଇଥିବା ଏହି ୧୩୨୬ ଜଣଙ୍କ ପାଇଁ ନୂଆ ଦାୟିତ୍ୱ ଓ କ୍ୟାରିୟରର ଏକ ନୂଆ ଅଧ୍ୟାୟ ଆରମ୍ଭ ହୋଇଛି। ରାଜ୍ୟରେ ଯୁବକ-ଯୁବତୀଙ୍କୁ ଅଧିକ ରୋଜଗାର ସୁଯୋଗ ଦେବା ପାଇଁ ନିଯୁକ୍ତି ପ୍ରକ୍ରିୟା ଜାରି ରହିବ ବୋଲି ସରକାରଙ୍କ ପକ୍ଷରୁ କୁହାଯାଇଛି।
