ନୂଆଦିଲ୍ଲୀ: ରୁଷର ରାଷ୍ଟ୍ରପତି Vladimir Putin ଭାରତର ସ୍ୱାଧୀନ ବୈଦେଶିକ ନୀତି ଓ ପ୍ରଧାନମନ୍ତ୍ରୀ Narendra Modiଙ୍କ ନେତୃତ୍ୱକୁ ଭୁରିଭୁରି ପ୍ରଶଂସା କରିଛନ୍ତି । ସେ କହିଛନ୍ତି ଯେ ଭାରତ ଉପରେ କୌଣସି ପ୍ରକାର ପ୍ରତିବନ୍ଧକ ଲାଗୁ କରିବାର ଧମକ ଦେବା ଉଦ୍ୟମ ବିପରୀତ ପ୍ରଭାବ ପକାଇବ ଏବଂ ଭାରତ ସଦା ନିଜର ଜାତୀୟ ସ୍ୱାର୍ଥକୁ ପ୍ରାଥମିକତା ଦେଇ ନିଷ୍ପତ୍ତି ନେଇଥାଏ ।
ସେଣ୍ଟ ପିଟର୍ସବର୍ଗ ଆନ୍ତର୍ଜାତିକ ଅର୍ଥନୈତିକ ଫୋରମରେ ଯୋଗଦେଇ ପୁଟିନ କହିଥିଲେ ଯେ, “ଭାରତ ଏକ ସାର୍ବଭୌମ ରାଷ୍ଟ୍ର ଭାବେ କାର୍ଯ୍ୟ କରେ । ପ୍ରଧାନମନ୍ତ୍ରୀ ମୋଦୀଙ୍କ ନେତୃତ୍ୱରେ ଭାରତ ଉପରେ କୌଣସି ପ୍ରତିବନ୍ଧକ ଧମକ ଦିଆଗଲେ ତାହା ତୁରନ୍ତ ବିପରୀତ ପ୍ରଭାବ ପକାଇବ । ଭାରତ ନିଜର ଆବଶ୍ୟକତା ଓ ଜାତୀୟ ସ୍ୱାର୍ଥ ଅନୁଯାୟୀ ସର୍ବୋତ୍ତମ ଉତ୍ପାଦ ବାଛିବାରେ ସ୍ୱାଧୀନ ।”
ପୁଟିନ କହିଛନ୍ତି ଯେ ରୁଷ ଓ ଭାରତ ମଧ୍ୟରେ ସମ୍ପର୍କ କୌଣସି ରାଜନୈତିକ ପରିସ୍ଥିତି ଉପରେ ନିର୍ଭରଶୀଳ ନୁହେଁ । ରୁଷ ସଦା ନିଜର ପ୍ରତିଶ୍ରୁତିକୁ ପାଳନ କରିବ ଏବଂ ଭାରତ ଭଳି ବିଶ୍ୱସ୍ତ ସହଯୋଗୀଙ୍କ ସହ ସମ୍ପର୍କକୁ ଆହୁରି ମଜବୁତ କରିବ ।
ସେ କହିଥିଲେ, “ଆମର ଭାରତ ସହ ସହଯୋଗ କୌଣସି ରାଜନୈତିକ ପରିବେଶ ଦ୍ୱାରା ପ୍ରଭାବିତ ହୁଏ ନାହିଁ । କେହି ଆମକୁ ଭାରତକୁ ଜିନିଷ ଯୋଗାଣ ନକରିବାକୁ ନିର୍ଦ୍ଦେଶ ଦେଇପାରିବେ ନାହିଁ । ଆମେ ସବୁବେଳେ ନିଜ ସହଯୋଗୀଙ୍କ ପ୍ରତି ଦିଆଯାଇଥିବା ପ୍ରତିଶ୍ରୁତି ପାଳନ କରିବୁ ।”
ଏହାସହ ପୁଟିନ ବିଶ୍ୱ ଅର୍ଥନୀତିରେ BRICS ଗୋଷ୍ଠୀର ବୃଦ୍ଧିଶୀଳ ପ୍ରଭାବକୁ ଉଲ୍ଲେଖ କରି କହିଛନ୍ତି ଯେ BRICS ଏବେ G7 ଦେଶଗୁଡ଼ିକୁ ଅର୍ଥନୈତିକ ଆକାରରେ ପଛରେ ପକାଇ ଦେଇଛି ।
ତାଙ୍କ କହିବା ଅନୁଯାୟୀ, ଗତ ପାଞ୍ଚ ବର୍ଷର ବିଶ୍ୱ ଜିଡିପି ବୃଦ୍ଧିର ପ୍ରାୟ ୪୯ ପ୍ରତିଶତ ଅବଦାନ BRICS ଦେଶମାନଙ୍କର ଥିବାବେଳେ G7 ଦେଶମାନଙ୍କ ଅବଦାନ ମାତ୍ର ୧୮ ପ୍ରତିଶତ। କ୍ରୟ କ୍ଷମତା ସମତା (PPP) ଆଧାରରେ ବିଶ୍ୱ ଜିଡିପିରେ BRICS ର ଅଂଶ ୪୦ ପ୍ରତିଶତ ଥିବାବେଳେ G7 ର ଅଂଶ ୨୯ ପ୍ରତିଶତରୁ କମ୍ ବୋଲି ସେ ଦାବି କରିଛନ୍ତି ।
ଭାରତର ଡିଜିଟାଲ ଓ ଆଇଟି କ୍ଷେତ୍ରକୁ ମଧ୍ୟ ପୁଟିନ ପ୍ରଶଂସା କରିଥିଲେ । ସେ କହିଛନ୍ତି, “ଭାରତ ଆଇଟି ଓ ସଫ୍ଟୱେର ଶିଳ୍ପରେ ବିଶ୍ୱର ଅଗ୍ରଣୀ ରାଷ୍ଟ୍ରମାନଙ୍କ ମଧ୍ୟରୁ ଗୋଟିଏ । ବିଶ୍ୱ ସଫ୍ଟୱେର ବଜାରରେ ଭାରତର ଗୁରୁତ୍ୱପୂର୍ଣ୍ଣ ଅବଦାନ ରହିଛି ।”
ପୁଟିନଙ୍କ ଏହି ବୟାନ ଭାରତ-ରୁଷ ସମ୍ପର୍କର ଦୃଢତାକୁ ପୁଣିଥରେ ସ୍ପଷ୍ଟ କରିଥିବାବେଳେ, ଆନ୍ତର୍ଜାତିକ ରାଜନୀତିରେ ଭାରତର ବଢ଼ୁଥିବା ପ୍ରଭାବକୁ ମଧ୍ୟ ପ୍ରତିଫଳିତ କରିଛି ।
