ମଧ୍ୟପ୍ରାଚ୍ୟରେ ଚାଲିଥିବା ଯୁଦ୍ଧ ମଧ୍ୟରେ ଓମାନ ଉପକୂଳରେ ଏକ ବଡ଼ ସମୁଦ୍ର ଦୁର୍ଘଟଣା ଘଟିଛି । ପାଲାଉ ପତାକାବାହୀ ତେଲ ଟ୍ୟାଙ୍କର MT Settebello ଉପରେ ଆମେରିକାର ସେଣ୍ଟ୍ରାଲ କମାଣ୍ଡ (CENTCOM) ପକ୍ଷରୁ କରାଯାଇଥିବା ଆକ୍ରମଣରେ ୩ ଜଣ ଭାରତୀୟ ନାବିକଙ୍କ ମୃତ୍ୟୁ ଘଟିଛି । ପୂର୍ବରୁ ସେମାନେ ନିଖୋଜ ଥିବା ସୂଚନା ମିଳିଥିଲା, କିନ୍ତୁ ପରେ ସେମାନଙ୍କ ମୃତଦେହ ଚିହ୍ନଟ ହୋଇଥିବା ଭାରତର ଜାହାଜ ଚଳାଚଳ ମନ୍ତ୍ରୀ ସର୍ବାନନ୍ଦ ସୋନୋୱାଲ ସୂଚନା ଦେଇଛନ୍ତି ।
ସୂଚନା ଅନୁଯାୟୀ, ଜାହାଜରେ ମୋଟ ୨୮ ଜଣ କ୍ରୁ ସଦସ୍ୟ ଥିଲେ । ସେଥିରୁ ୨୪ ଜଣ ଭାରତୀୟ ଓ ଅନ୍ୟମାନେ ବିଦେଶୀ ନାଗରିକ ଥିଲେ । ଆକ୍ରମଣ ପରେ ୨୧ ଜଣ ଭାରତୀୟ ନାବିକଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଥିବାବେଳେ ୩ ଜଣ ନିଖୋଜ ଥିଲେ । ପରେ ସେମାନଙ୍କ ମୃତ୍ୟୁ ନିଶ୍ଚିତ ହୋଇଛି ।
ଆମେରିକୀୟ ସେନାର ଦାବି ଅନୁଯାୟୀ, ଉକ୍ତ ଟ୍ୟାଙ୍କରଟି ଇରାନରୁ ତେଲ ପରିବହନ କରୁଥିଲା ଏବଂ ଚାଲୁଥିବା ଅବରୋଧକୁ ଉଲ୍ଲଂଘନ କରିଥିଲା । ଏହି କାରଣରୁ ଜାହାଜର ଇଞ୍ଜିନ୍ ରୁମ୍କୁ ଲକ୍ଷ୍ୟ କରି ‘ପ୍ରିସିଜନ୍ ମ୍ୟୁନିସନ୍’ ବ୍ୟବହାର କରାଯାଇଥିଲା ବୋଲି CENTCOM କହିଛି ।
ଏହି ଘଟଣାକୁ ଭାରତ ସରକାର ଗୁରୁତର ଭାବେ ନେଇଛନ୍ତି । ବିଦେଶ ମନ୍ତ୍ରଣାଳୟ ପକ୍ଷରୁ ଆମେରିକାର ଶୀର୍ଷ କୂଟନୀତିଜ୍ଞଙ୍କୁ ଡାକି କଡ଼ା ପ୍ରତିବାଦ ଜଣାଯାଇଛି । ସମୁଦ୍ର ପଥରେ ବାଣିଜ୍ୟିକ ଜାହାଜ ଉପରେ ଏପରି ଆକ୍ରମଣ ଚିନ୍ତାଜନକ ବୋଲି ଭାରତ କହିଛି ଏବଂ ଅଞ୍ଚଳରେ ତୁରନ୍ତ ଉତ୍ତେଜନା ହ୍ରାସ କରିବାକୁ ଆହ୍ୱାନ କରିଛି ।
ଏହି ଘଟଣା ମଧ୍ୟପ୍ରାଚ୍ୟରେ ଚାଲିଥିବା ଆମେରିକା-ଇରାନ କୁ ଆହୁରି ଗମ୍ଭୀର କରିଦେଇଛି । ବିଶ୍ୱ ବାଣିଜ୍ୟ ଓ ତେଲ ପରିବହନ ପାଇଁ ଗୁରୁତ୍ୱପୂର୍ଣ୍ଣ ହର୍ମୁଜ୍ ପ୍ରଣାଳୀ ଅଞ୍ଚଳରେ ଏହି ଘଟଣା ଆନ୍ତର୍ଜାତିକ ସ୍ତରରେ ଚିନ୍ତା ବଢ଼ାଇଛି ।
