ଆସାମର ଜୋରହାଟ ବାୟୁସେନା ଘାଟିରେ ଶନିବାର ଏକ ଦୁଃଖଦ ଘଟଣା ଘଟିଛି । ଭାରତୀୟ ବାୟୁସେନା (IAF)ର AN-32 ପରିବହନ ବିମାନ ଅବତରଣ ସମୟରେ ଦୁର୍ଘଟଣାଗ୍ରସ୍ତ ହୋଇ ୫ ଜଣ ବାୟୁସେନା କର୍ମୀଙ୍କ ଜୀବନ ଯାଇଛି । ପ୍ରାପ୍ତ ସୂଚନା ଅନୁଯାୟୀ, ବିମାନଟି ସକାଳ ପ୍ରାୟ ୧୦ଟା ସମୟରେ ଏକ ନିୟମିତ ଉଡ଼ାଣ ଭରିଥିଲା । ପରେ ବିମାନଟି ଅବତରଣ ପାଇଁ ଅନୁମତି ମାଗିଥିଲା । ଅବତରଣ ସମୟରେ ବିମାନଟି ରନୱେରୁ ଖସିଯାଇ ଦୁଇ ଖଣ୍ଡ ହୋଇଯାଇଥିଲା ଏବଂ ପରେ ନିଆଁ ଲାଗିଯାଇଥିଲା ।
ଦୁର୍ଘଟଣା ପରେ ତୁରନ୍ତ ଉଦ୍ଧାରକାରୀ ଦଳ ଓ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ନିୟନ୍ତ୍ରଣ କରିଥିଲେ । ବାୟୁସେନା ପକ୍ଷରୁ ୫ ଜଣ କର୍ମୀଙ୍କ ମୃତ୍ୟୁ ନିଶ୍ଚିତ କରାଯାଇଛି । ସହ-ପାଇଲଟ୍ ଏହି ଦୁର୍ଘଟଣାରେ ବଞ୍ଚିଯାଇଥିବା ବେଳେ ତାଙ୍କୁ ଚିକିତ୍ସା ପାଇଁ ହସ୍ପିଟାଲରେ ଭର୍ତ୍ତି କରାଯାଇଛି ।
ଭାରତୀୟ ବାୟୁସେନା ଏହି ଘଟଣାର କାରଣ ଜାଣିବା ପାଇଁ ‘କୋର୍ଟ ଅଫ୍ ଇନକ୍ୱାରି’ ଗଠନ କରି ତଦନ୍ତ ଆରମ୍ଭ କରିଛି । ପ୍ରତିରକ୍ଷା ମନ୍ତ୍ରୀ ଏବଂ ବାୟୁସେନାର ଶୀର୍ଷ ଅଧିକାରୀମାନେ ମୃତକଙ୍କ ପରିବାର ପ୍ରତି ଗଭୀର ଶୋକ ପ୍ରକାଶ କରିଛନ୍ତି ।
