ଭୁବନେଶ୍ୱର, ୧୬ ଜୁନ୍: ଆସନ୍ତା ଜୁନ୍ ୨୦ ତାରିଖରେ ପ୍ରଧାନମନ୍ତ୍ରୀ Narendra Modi ଓ ରାଷ୍ଟ୍ରପତି Droupadi Murmu ଓଡ଼ିଶା ଗସ୍ତରେ ଆସୁଛନ୍ତି । ଏହି ଗସ୍ତ ସମୟରେ ପ୍ରଧାନମନ୍ତ୍ରୀ ମୟୂରଭଞ୍ଜ ଜିଲ୍ଲାର ପାହାଡ଼ପୁର ଗାଁକୁ ଯିବେ, ଯାହା ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଶ୍ୱଶୁରଘର ଗାଁ ଭାବେ ପରିଚିତ । ଏହି ଗସ୍ତକୁ ନେଇ ରାଜ୍ୟ ସରକାର ଓ ପ୍ରଶାସନ ପକ୍ଷରୁ ବ୍ୟାପକ ପ୍ରସ୍ତୁତି ଚାଲିଛି ।
ଓଡ଼ିଶାରେ ବିଜେପି ସରକାରଙ୍କ ଦୁଇ ବର୍ଷ ପୂର୍ତ୍ତି ଅବସରରେ ରାଇରଙ୍ଗପୁରରେ ଏକ ବିଶାଳ ସାଧାରଣ ସଭା ଆୟୋଜିତ ହେବ । ଏହି କାର୍ଯ୍ୟକ୍ରମରେ ରାଷ୍ଟ୍ରପତି ଓ ପ୍ରଧାନମନ୍ତ୍ରୀ ଏକାଠି ଯୋଗଦେବା ଓଡ଼ିଶା ଇତିହାସରେ ପ୍ରଥମ ଘଟଣା ହେବ । ଉଭୟ ନେତା ରାଜ୍ୟର ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଉଦ୍ଘାଟନ ଏବଂ ଶିଳାନ୍ୟାସ କରିବେ ।
ସୂଚନା ଅନୁସାରେ, ଜୁନ୍ ୨୦ରେ ପ୍ରଧାନମନ୍ତ୍ରୀ ମୋଦୀ ପାହାଡ଼ପୁର ହେଲିପ୍ୟାଡରେ ପହଞ୍ଚିବେ । ଏହାପରେ ସେ ରାଷ୍ଟ୍ରପତି ମୁର୍ମୁଙ୍କ ସହ ପାହାଡ଼ପୁରରେ ଏକ ସ୍ଥାନୀୟ କାର୍ଯ୍ୟକ୍ରମ ଓ ପ୍ରଦର୍ଶନୀ ପରିଦର୍ଶନ କରିବେ । ଏହାପରେ ରାଇରଙ୍ଗପୁରର ଦାଣ୍ଡବୋଷ ଅଞ୍ଚଳରେ ଆୟୋଜିତ ମୁଖ୍ୟ ସଭାରେ ଯୋଗଦେବେ ।
ଏହି ଗସ୍ତ ସମୟରେ ରାଇରଙ୍ଗପୁରର ନୂତନ ଷ୍ଟାଡିୟମ୍ର ଉଦ୍ଘାଟନ, ପାହାଡ଼ପୁର ଓ ବାମନଘାଟି ଅଞ୍ଚଳର ବିଭିନ୍ନ ଉନ୍ନୟନ ପ୍ରକଳ୍ପର ଶିଳାନ୍ୟାସ ଏବଂ ରାଜ୍ୟର କିଛି ଗୁରୁତ୍ୱପୂର୍ଣ୍ଣ ରେଳ ପ୍ରକଳ୍ପର ଶୁଭାରମ୍ଭ ହେବାର ସମ୍ଭାବନା ରହିଛି । ପୁରୀ–କୋରାପୁଟ ନୂତନ ଟ୍ରେନ୍ ସେବାର ଶୁଭାରମ୍ଭ ସହ କିଛି ଅମୃତ ଭାରତ ଷ୍ଟେସନର ଉଦ୍ଘାଟନ ମଧ୍ୟ କରାଯାଇପାରେ ।
ରାଷ୍ଟ୍ରପତି ମୁର୍ମୁ ଜୁନ୍ ୧୯ରୁ ରାଇରଙ୍ଗପୁରରେ ରହିବେ । ତାଙ୍କ ଜନ୍ମଭୂମି ଓ ଶ୍ୱଶୁରଘର ଅଞ୍ଚଳରେ ହେବାକୁ ଥିବା ଏହି କାର୍ଯ୍ୟକ୍ରମ ମୟୂରଭଞ୍ଜ ଜିଲ୍ଲା ପାଇଁ ଏକ ଐତିହାସିକ ମୁହୂର୍ତ୍ତ ହେବ ବୋଲି ମନେ କରାଯାଉଛି । ରାଜ୍ୟ ସରକାର ପକ୍ଷରୁ ସୁରକ୍ଷା, ଯାତାୟାତ, ପାର୍କିଂ ଓ ସାଧାରଣ ଲୋକଙ୍କ ସୁବିଧା ପାଇଁ ବ୍ୟାପକ ବ୍ୟବସ୍ଥା କରାଯାଉଛି ।
