କୋଲକାତା: ଐତିହାସିକ ରେଡ୍ ରୋଡ୍ରେ ରବିବାର 12ତମ ଆନ୍ତର୍ଜାତୀୟ ଯୋଗ ଦିବସ ଭବ୍ୟ ଭାବେ ପାଳିତ ହୋଇଛି । ପ୍ରଧାନମନ୍ତ୍ରୀ Narendra Modi ଏହି ଜାତୀୟ କାର୍ଯ୍ୟକ୍ରମର ନେତୃତ୍ୱ ନେଇ ହଜାର ହଜାର ଯୋଗସାଧକଙ୍କ ସହ ଯୋଗାଭ୍ୟାସ କରିଥିଲେ । ଚଳିତ ବର୍ଷର ଥିମ୍ “Yoga for Healthy Ageing” ରହିଥିବା ବେଳେ, ଏହା ଶାରୀରିକ ସୁସ୍ଥତା, ମାନସିକ ସନ୍ତୁଳନ, ଭାବନାତ୍ମକ ଦୃଢ଼ତା ଏବଂ ସକ୍ରିୟ ବୃଦ୍ଧାବସ୍ଥାକୁ ପ୍ରୋତ୍ସାହନ ଦେବା ଉପରେ କେନ୍ଦ୍ରିତ ଥିଲା ।
କାର୍ଯ୍ୟକ୍ରମକୁ ସମ୍ବୋଧିତ କରି ପ୍ରଧାନମନ୍ତ୍ରୀ କହିଥିଲେ ଯେ, “ଯୋଗ ଆମ ସମସ୍ତଙ୍କୁ ସଂଯୋଗ କରେ ଏବଂ ଏକତ୍ର କରି ରଖେ ।” ସେ ଯୋଗକୁ କେବଳ ବ୍ୟାୟାମ ନୁହେଁ, ବରଂ ମାନବ ଆତ୍ମାର ଏକ ଅଭିବ୍ୟକ୍ତି ବୋଲି ବର୍ଣ୍ଣନା କରିଥିଲେ । ତାଙ୍କ ମତରେ, ଯୋଗ ଶରୀରକୁ ନମନୀୟ, ମନକୁ ଶାନ୍ତ ଏବଂ ଜୀବନକୁ ଚାପମୁକ୍ତ ରଖିବାରେ ସହାୟକ ହୋଇଥାଏ ।
ଏହି ଅବସରରେ ପ୍ରଧାନମନ୍ତ୍ରୀ କହିଥିଲେ ଯେ “Healthy Ageing” କେବଳ ବୟସ୍କ ଲୋକଙ୍କ ପାଇଁ ନୁହେଁ, ସମସ୍ତ ବୟସର ଲୋକଙ୍କ ପାଇଁ ପ୍ରାସଙ୍ଗିକ । ଯୋଗ ମାଧ୍ୟମରେ 40 ବର୍ଷରେ 20 ବର୍ଷ ଅପେକ୍ଷା ଅଧିକ ନମନୀୟ ଓ 50 ବର୍ଷରେ 30 ବର୍ଷ ଅପେକ୍ଷା ଅଧିକ ଉର୍ଜାବାନ ରହିବା ସମ୍ଭବ ବୋଲି ସେ ଉଲ୍ଲେଖ କରିଥିଲେ । ଯୋଗ ଜୀବନଶୈଳୀଜନିତ ରୋଗକୁ ଦୂରେଇ ରଖିବା ସହ ଦୀର୍ଘକାଳୀନ ସୁସ୍ଥ ଜୀବନର ମାର୍ଗ ପ୍ରଦର୍ଶନ କରେ ।
କୋଲକାତାର ରେଡ୍ ରୋଡ୍ରେ ଆୟୋଜିତ ମୁଖ୍ୟ କାର୍ଯ୍ୟକ୍ରମରେ 30 ହଜାରରୁ ଅଧିକ ଲୋକ ଯୋଗ ଦେଇଥିଲେ । ଯୋଗ ସେସନ୍ ସମୟରେ ପ୍ରଧାନମନ୍ତ୍ରୀ ମଞ୍ଚରୁ ତଳକୁ ଆସି କିଛି ଅଂଶଗ୍ରହଣକାରୀଙ୍କୁ ଯୋଗାସନର ସଠିକ୍ ମୁଦ୍ରା ବିଷୟରେ ପରାମର୍ଶ ମଧ୍ୟ ଦେଇଥିଲେ । ଏହା ଉପସ୍ଥିତ ଲୋକଙ୍କ ମଧ୍ୟରେ ଉତ୍ସାହ ସୃଷ୍ଟି କରିଥିଲା ।
ଆନ୍ତର୍ଜାତୀୟ ଯୋଗ ଦିବସ ଅବସରରେ ଭାରତ ସହ ବିଶ୍ୱର ଅନେକ ଦେଶରେ ଯୋଗ କାର୍ଯ୍ୟକ୍ରମ ଆୟୋଜିତ ହୋଇଥିଲା । ସେନା, ଛାତ୍ରଛାତ୍ରୀ, ସରକାରୀ କର୍ମଚାରୀ ଓ ସାଧାରଣ ନାଗରିକମାନେ ବିଭିନ୍ନ ସ୍ଥାନରେ ଯୋଗାଭ୍ୟାସ କରି ସୁସ୍ଥ ଜୀବନର ସନ୍ଦେଶ ଦେଇଥିଲେ ।
ଉଲ୍ଲେଖଯୋଗ୍ୟ ଯେ, 2014 ମସିହାରେ ଜାତିସଂଘରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ପ୍ରସ୍ତାବ ପରେ 21 ଜୁନ୍କୁ ଆନ୍ତର୍ଜାତୀୟ ଯୋଗ ଦିବସ ଭାବେ ସ୍ୱୀକୃତି ମିଳିଥିଲା ଏବଂ 2015 ଠାରୁ ଏହା ପାଳିତ ହୋଇଆସୁଛି ।
