ବିଶ୍ଵ: 2026 ଫିଫା ବିଶ୍ୱକପ୍ର ଗ୍ରୁପ୍-ଡି ମ୍ୟାଚ୍ରେ ପାରାଗୁଏ ଅସାଧାରଣ ଦୃଢତା ଦେଖାଇ ତୁର୍କିକୁ 1-0 ଗୋଲ୍ରେ ପରାସ୍ତ କରିଛି । ବିଶେଷ କଥା ହେଉଛି, ପାରାଗୁଏ ଦ୍ୱିତୀୟାର୍ଦ୍ଧର ବଡ଼ ଅଂଶ 10 ଜଣ ଖେଳାଳି ସହ ଖେଳିଥିଲେ ମଧ୍ୟ ନିଜର ଅଗ୍ରଣୀକୁ ବଜାୟ ରଖିବାରେ ସଫଳ ହୋଇଥିଲା । ଏହି ପରାଜୟ ସହ ତୁର୍କିଏର ବିଶ୍ୱକପ୍ ଅଭିଯାନ ଆନୁଷ୍ଠାନିକ ଭାବେ ଶେଷ ହୋଇଛି ।
ମ୍ୟାଚ୍ ଆରମ୍ଭ ହେବାର ମାତ୍ର 64 ସେକେଣ୍ଡ ମଧ୍ୟରେ ପାରାଗୁଏର ମିଡଫିଲ୍ଡର ମାଟିଆସ ଗାଲାର୍ଜା ଦୂରରୁ ଏକ ଚମତ୍କାର ଶଟ୍ ମାରି ଗୋଲ୍ କରିଥିଲେ । ଏହା ବିଶ୍ୱକପ୍ 2026ର ସବୁଠାରୁ ଦ୍ରୁତତମ ଗୋଲ୍ ଭାବେ ରେକର୍ଡ ହୋଇଛି । ଏହି ଗୋଲ୍ଟି ପରେ ମ୍ୟାଚ୍ର ନିର୍ଣ୍ଣାୟକ ମୁହୂର୍ତ୍ତ ସାବ୍ୟସ୍ତ ହୋଇଥିଲା ।
ପ୍ରଥମାର୍ଦ୍ଧର ଅତିରିକ୍ତ ସମୟରେ ପାରାଗୁଏ ଏକ ବଡ଼ ଝଟକା ଖାଇଥିଲା । ଦଳର ଅଭିଜ୍ଞ ମିଡଫିଲ୍ଡର ମିଗୁଏଲ ଆଲ୍ମିରୋନ୍ ତୁର୍କି ଡିଫେଣ୍ଡର ମର୍ଟ ମୁଲଦୁରଙ୍କ ସହ ବିବାଦ ପରେ ସିଧାସଳଖ ଲାଲ୍ କାର୍ଡ ପାଇଥିଲେ । ଏହା ପରେ ପାରାଗୁଏକୁ ସମଗ୍ର ଦ୍ୱିତୀୟାର୍ଦ୍ଧ 10 ଜଣ ଖେଳାଳି ସହ ଖେଳିବାକୁ ପଡ଼ିଥିଲା ।
ଜଣେ ଖେଳାଳି ଅଧିକ ଥିଲେ ମଧ୍ୟ ତୁର୍କି ସୁଯୋଗଗୁଡ଼ିକୁ ଗୋଲ୍ରେ ପରିଣତ କରିପାରି ନଥିଲା। ଦଳ 32ଟି ଶଟ୍ ନେଇଥିଲା ଏବଂ ମ୍ୟାଚ୍ର ଅଧିକାଂଶ ସମୟ ବଲ୍ ନିଜ ନିୟନ୍ତ୍ରଣରେ ରଖିଥିଲା । ଏକ ସୁନିଶ୍ଚିତ ହେଡର୍ କ୍ରସବାର ଓ ପୋଷ୍ଟରେ ବାଜି ଫେରିଆସିଥିଲା । ତଥାପି ପାରାଗୁଏର ରକ୍ଷଣଭାଗ ଦୃଢ଼ତାର ସହ ଲଢ଼ି ବିଜୟ ସୁନିଶ୍ଚିତ କରିଥିଲା ।
ଏହି ବିଜୟ ପାରାଗୁଏ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଥିଲା । ପ୍ରଥମ ମ୍ୟାଚ୍ରେ ଯୁକ୍ତରାଷ୍ଟ୍ର ବିପକ୍ଷରେ 1-4ରେ ପରାଜିତ ହେବା ପରେ ଦଳ ଚାପରେ ଥିଲା । କିନ୍ତୁ ତୁର୍କି ବିରୋଧରେ ବିଜୟ ଦଳର ନକ୍-ଆଉଟ୍ ଆଶାକୁ ଜୀବନ୍ତ ରଖିଛି ।
ଅନ୍ୟପଟେ ତୁର୍କି ପ୍ରଥମ ମ୍ୟାଚ୍ରେ ଅଷ୍ଟ୍ରେଲିଆ ନିକଟରୁ 0-2ରେ ହାରିଥିଲା । ପାରାଗୁଏ ବିପକ୍ଷରେ ପରାଜୟ ପରେ ଦଳ ଲଗାତାର ଦୁଇଟି ମ୍ୟାଚ୍ ହାରି ବିଶ୍ୱକପ୍ରୁ ବିଦାୟ ନେଇଛି । 24 ବର୍ଷ ପରେ ବିଶ୍ୱକପ୍କୁ ଫେରିଥିବା ତୁର୍କି ପାଇଁ ଏହା ଏକ ବଡ଼ ନିରାଶାଜନକ ଅଭିଯାନ ହୋଇ ରହିଲା ।
