ପୁରୀ: ବିଶ୍ୱପ୍ରସିଦ୍ଧ ଶ୍ରୀଜଗନ୍ନାଥ ରଥଯାତ୍ରା 2026କୁ ସୁରକ୍ଷିତ ଓ ସୁଚାରୁ ଭାବେ ଆୟୋଜନ କରିବା ପାଇଁ ଓଡ଼ିଶା ସରକାର ଓ ପୁରୀ ଜିଲ୍ଲା ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ଯୋଜନା ପ୍ରସ୍ତୁତ କରାଯାଇଛି। ଗତ ବର୍ଷର ଅପ୍ରୀତିକର ଘଟଣା ଏବଂ ବିପୁଳ ଜନସମାଗମକୁ ଦୃଷ୍ଟିରେ ରଖି ଏବର୍ଷ ଭିଡ଼ ନିୟନ୍ତ୍ରଣ, ଜରୁରୀକାଳୀନ ଉଦ୍ଧାର ଓ ସ୍ୱାସ୍ଥ୍ୟସେବା ଉପରେ ବିଶେଷ ଗୁରୁତ୍ୱ ଦିଆଯାଇଛି। ପ୍ରଶାସନ ପକ୍ଷରୁ ପୁରୀ ସହରର ବିଭିନ୍ନ ସ୍ଥାନରେ 28ଟି ଇଭାକ୍ୟୁଏସନ୍ ପଏଣ୍ଟ (Evacuation Points) ଚିହ୍ନଟ କରାଯାଇଛି, ଯେଉଁଠାରୁ ଜରୁରୀ ସମୟରେ ଭକ୍ତମାନଙ୍କୁ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରାଯିବ।
ପୁଲିସ ଓ ପ୍ରଶାସନ ସୂତ୍ର ଅନୁଯାୟୀ, ରଥଯାତ୍ରା ସମୟରେ ସମଗ୍ର ପୁରୀ ସହରକୁ ଆଠଟି ସୁରକ୍ଷା ଭର୍ଟିକାଲରେ ବିଭକ୍ତ କରାଯାଇଛି। ଶ୍ରୀମନ୍ଦିର, ବଡ଼ଦାଣ୍ଡ, ଗୁଣ୍ଡିଚା ମନ୍ଦିର, ଟ୍ରାଫିକ୍ ପରିଚାଳନା, ରେଳ ଷ୍ଟେସନ୍, ସମୁଦ୍ରତଟ ଏବଂ ଭିଡ଼ ନିୟନ୍ତ୍ରଣ ପାଇଁ ପୃଥକ ଅଧିକାରୀ ନିଯୁକ୍ତ ହେବେ। ପ୍ରତ୍ୟେକ ଭର୍ଟିକାଲର ଦାୟିତ୍ୱରେ ଦୁଇଜଣ ଲେଖାଏଁ IPS ଅଧିକାରୀ ରହିବେ।
ଭକ୍ତମାନଙ୍କ ସୁରକ୍ଷା ପାଇଁ ଅତିରିକ୍ତ CCTV କ୍ୟାମେରା, AI-ସକ୍ଷମ ନଜରଦାରୀ ବ୍ୟବସ୍ଥା, ଡ୍ରୋନ୍ ମନିଟରିଂ ଓ କଣ୍ଟ୍ରୋଲ୍ ରୁମ୍ ସ୍ଥାପନ କରାଯାଉଛି। ରଥଯାତ୍ରା ସମୟରେ ଅପ୍ରତ୍ୟାଶିତ ପରିସ୍ଥିତିର ମୁକାବିଲା ପାଇଁ ଆଠଟି ଅସ୍ଥାୟୀ ହସ୍ପିଟାଲ୍, ମେଡିକାଲ୍ ଟିମ୍ ଏବଂ ଆମ୍ବୁଲାନ୍ସ ସେବା ମଧ୍ୟ ମୁତୟନ ହେବ। ବର୍ଷା ଓ ଜଳଜମା ସମସ୍ୟାକୁ ଦୂର କରିବା ପାଇଁ ବିଭିନ୍ନ ସ୍ଥାନରେ ଜଳ ନିଷ୍କାସନ ବ୍ୟବସ୍ଥାକୁ ସୁଦୃଢ଼ କରାଯାଇଛି।
ଏହାଛଡ଼ା ଟ୍ରାଫିକ୍ ପରିଚାଳନା, ପାର୍କିଂ ଜୋନ୍, ରେଳ ଷ୍ଟେସନ୍ ସୁରକ୍ଷା, ହୋଟେଲ୍ ଓ ଲଜ୍ ଯାଞ୍ଚ ସହ ଜରୁରୀ ପ୍ରତିକ୍ରିୟା ଯୋଜନାକୁ ମଧ୍ୟ ଚୂଡ଼ାନ୍ତ କରାଯାଇଛି। ପ୍ରଶାସନର ଲକ୍ଷ୍ୟ ହେଉଛି ଲକ୍ଷାଧିକ ଭକ୍ତଙ୍କ ପାଇଁ ଏକ ସୁରକ୍ଷିତ ଓ ସୁବ୍ୟବସ୍ଥିତ ରଥଯାତ୍ରା ସୁନିଶ୍ଚିତ କରିବା।
