ଭେନେଜୁଏଲା: ଭେନେଜୁଏଲାରେ 24 ଜୁନ୍ 2026ରେ ଦୁଇଟି ଶକ୍ତିଶାଳୀ ଭୂମିକମ୍ପ ଦେଶବ୍ୟାପୀ ଆତଙ୍କ ସୃଷ୍ଟି କରିଛି । ଆମେରିକାର ଭୂତାତ୍ତ୍ୱିକ ସର୍ଭେ (USGS) ଅନୁସାରେ ପ୍ରଥମେ 7.2 ତୀବ୍ରତାର ଭୂମିକମ୍ପ ଓ ମାତ୍ର 39 ସେକେଣ୍ଡ ପରେ 7.5 ତୀବ୍ରତାର ଆଉ ଏକ ଭୂମିକମ୍ପ ଆଘାତ କରିଥିଲା । ଏହାର କେନ୍ଦ୍ରସ୍ଥଳ କାରାକାସର ପଶ୍ଚିମ ଅଞ୍ଚଳ ନିକଟରେ ଥିଲା ।
ଭୂମିକମ୍ପର ପ୍ରଭାବରେ ରାଜଧାନୀ କାରାକାସ ଓ ପାର୍ଶ୍ୱବର୍ତ୍ତୀ ଅଞ୍ଚଳର ଅନେକ ବହୁତଳ ଭବନ ଧସିପଡ଼ିଛି । ଉଦ୍ଧାରକାରୀ ଦଳ ଧ୍ୱଂସସ୍ତୂପ ତଳେ ଫସିଥିବା ଲୋକଙ୍କୁ ଖୋଜିବା କାର୍ଯ୍ୟ ଜାରି ରଖିଛନ୍ତି । ପ୍ରାଥମିକ ରିପୋର୍ଟ ଅନୁଯାୟୀ, ଅତି କମରେ 32 ଜଣଙ୍କ ମୃତ୍ୟୁ ଘଟିଥିବା ବେଳେ ଶତାଧିକ ଲୋକ ଆହତ ହୋଇଛନ୍ତି ।
Delcy Rodríguez ଦେଶରେ ଜାତୀୟ ଜରୁରୀକାଳ ଘୋଷଣା କରିଛନ୍ତି । ସେ କହିଛନ୍ତି ଯେ ମୁଖ୍ୟ ଭୂମିକମ୍ପ ପରେ ପ୍ରାୟ 20ଟି ପରାଘାତ (Aftershocks) ରେକର୍ଡ କରାଯାଇଛି, ଯାହା ଅଧିକ କ୍ଷୟକ୍ଷତିର ଆଶଙ୍କା ସୃଷ୍ଟି କରୁଛି । ସମସ୍ତ ଶିକ୍ଷାନୁଷ୍ଠାନ ଓ ଅଣ-ଜରୁରୀ ସରକାରୀ କାର୍ଯ୍ୟକଳାପକୁ ସାମୟିକ ଭାବେ ବନ୍ଦ କରାଯାଇଛି ।
ଭୂମିକମ୍ପରେ ଗୁରୁତର କ୍ଷତିଗ୍ରସ୍ତ ହୋଇଥିବାରୁ ଦେଶର ପ୍ରମୁଖ ବିମାନବନ୍ଦର Simón Bolívar International Airport (ମାଇକ୍ୱେଟିଆ)କୁ ଅନିର୍ଦ୍ଦିଷ୍ଟ ସମୟ ପାଇଁ ବନ୍ଦ କରାଯାଇଛି । ବିମାନବନ୍ଦରର ଛାତ ଓ ଅନ୍ୟାନ୍ୟ ଢାଞ୍ଚାରେ ଗୁରୁତର କ୍ଷତି ଘଟିଥିବା ଜଣାପଡ଼ିଛି । ଏହା ସହ କାରାକାସ ମେଟ୍ରୋ ଓ ରେଳ ସେବାକୁ ମଧ୍ୟ ସ୍ଥଗିତ ରଖାଯାଇଛି ।
ଆନ୍ତର୍ଜାତିକ ସହାୟତା ପାଇଁ ଅନେକ ଦେଶ ଆଗକୁ ଆସିଛନ୍ତି । ଭେନେଜୁଏଲା ସରକାର ଉଦ୍ଧାର ଓ ପୁନର୍ବାସ କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ବିଦେଶୀ ଉଦ୍ଧାରକାରୀ ଦଳଙ୍କୁ ସ୍ୱାଗତ କରିଛି ।
