ଫ୍ରାନ୍ସର ଏଭିଆନ୍ରେ ଆୟୋଜିତ ଜି-୭ ଶିଖର ସମ୍ମିଳନୀ ୨୦୨୬ରେ ପ୍ରଧାନମନ୍ତ୍ରୀ Narendra Modi କୃତ୍ରିମ ବୁଦ୍ଧିମତା (AI) ସମ୍ପର୍କିତ ବିଶ୍ୱସ୍ତରୀୟ ଆଲୋଚନାରେ ଭାରତର ଦୃଷ୍ଟିକୋଣ ଉପସ୍ଥାପନ କରିଛନ୍ତି। “Ensuring a Safe, Rapid and Efficient Rollout of Artificial Intelligence” ଶୀର୍ଷକ ଅଧିବେଶନରେ ଉଦବୋଧନ ଦେଇ ସେ କହିଥିଲେ ଯେ AI କେବଳ ପ୍ରଯୁକ୍ତିଗତ ଉନ୍ନତିର ମାଧ୍ୟମ ନୁହେଁ, ବରଂ ଏହା ମଣିଷର କ୍ଷମତା ବଢ଼ାଇବା, ମଣିଷର ସ୍ୱାଧୀନ ପସନ୍ଦକୁ ସଶକ୍ତ କରିବା ଏବଂ ମାନବ ମର୍ଯ୍ୟାଦାକୁ ସୁରକ୍ଷା ଦେବା ଉଚିତ।
ପ୍ରଧାନମନ୍ତ୍ରୀ ମୋଦୀ ଜୋର ଦେଇ କହିଥିଲେ ଯେ AI ର ବିକାଶ ଓ ବ୍ୟବହାରରେ ମାନବ-କେନ୍ଦ୍ରିକ ଦୃଷ୍ଟିକୋଣ ଅତ୍ୟାବଶ୍ୟକ। ତାଙ୍କ ମତରେ, ଏହି ପ୍ରଯୁକ୍ତି ମାନବ ସମାଜକୁ ଆଗକୁ ନେବା ସହିତ ନିରାପତ୍ତା, ଗୋପନୀୟତା ଓ ନୈତିକ ମୂଲ୍ୟବୋଧକୁ ମଧ୍ୟ ସୁରକ୍ଷିତ ରଖିବା ଦରକାର। ସେ କହିଥିଲେ ଯେ ବିଶ୍ୱ ସମୁଦାୟ AI ର ଦ୍ରୁତ ବିକାଶ ସହିତ ଏହାର ସମ୍ଭାବ୍ୟ ବିପଦକୁ ମଧ୍ୟ ଗୁରୁତ୍ୱର ସହ ବିଚାର କରିବା ଆବଶ୍ୟକ।
ମୋଦି ଭାରତର AI କ୍ଷେତ୍ରରେ ହେଉଥିବା ପଦକ୍ଷେପଗୁଡ଼ିକର ଉଲ୍ଲେଖ କରି କହିଥିଲେ ଯେ ଭାରତ ଡିଜିଟାଲ ପବ୍ଲିକ ଇନଫ୍ରାସ୍ଟ୍ରକ୍ଚର, ଅନ୍ତର୍ଭୁକ୍ତିମୂଳକ ପ୍ରଯୁକ୍ତି ଏବଂ ଦାୟିତ୍ୱଶୀଳ AI ବିକାଶରେ ଗୁରୁତ୍ୱ ଦେଉଛି। ଏହା ସହ ସେ ଉନ୍ନୟନଶୀଳ ଦେଶଗୁଡ଼ିକ ଏବଂ ଗ୍ଲୋବାଲ୍ ସାଉଥ୍ର ଆବଶ୍ୟକତାକୁ AI ନୀତିର କେନ୍ଦ୍ରବିନ୍ଦୁରେ ରଖିବାକୁ ଆହ୍ୱାନ କରିଥିଲେ।
ଜି-୭ ସମ୍ମିଳନୀରେ AI ବିଷୟଟି ଏଥର ପ୍ରମୁଖ ଆଲୋଚ୍ୟ ବିଷୟ ଭାବେ ଉଭା ହୋଇଥିଲା। ବିଶ୍ୱର ବଡ଼ ପ୍ରଯୁକ୍ତି କମ୍ପାନୀ ଓ AI କ୍ଷେତ୍ରର ନେତୃତ୍ୱମାନେ ମଧ୍ୟ ଏହି ଆଲୋଚନାରେ ଯୋଗ ଦେଇଥିଲେ। AI ର ନିରାପତ୍ତା, ନିୟନ୍ତ୍ରଣ, ନୈତିକ ବ୍ୟବହାର ଓ ବିଶ୍ୱବ୍ୟାପୀ ସହଯୋଗ ଉପରେ ବିଶେଷ ଚର୍ଚ୍ଚା ହୋଇଥିଲା।
ପ୍ରଧାନମନ୍ତ୍ରୀ ମୋଦିଙ୍କ ଏହି ବାର୍ତ୍ତା ବିଶ୍ୱ ସମୁଦାୟକୁ ସ୍ପଷ୍ଟ ସଙ୍କେତ ଦେଇଛି ଯେ ଭାରତ AI କୁ କେବଳ ଆର୍ଥିକ ଓ ପ୍ରଯୁକ୍ତିଗତ ଉନ୍ନତିର ଉପକରଣ ଭାବେ ନୁହେଁ, ବରଂ ମାନବ କଲ୍ୟାଣ, ସାମାଜିକ ନ୍ୟାୟ ଓ ସମାନ ସୁଯୋଗର ମାଧ୍ୟମ ଭାବେ ଦେଖୁଛି। ଭାରତର ଏହି ଦୃଷ୍ଟିକୋଣ ଆଗାମୀ ଦିନରେ ବିଶ୍ୱ AI ଶାସନ ବ୍ୟବସ୍ଥାରେ ଗୁରୁତ୍ୱପୂର୍ଣ୍ଣ ଭୂମିକା ନେଇପାରେ।
