ଆମେରିକା: ସରକାର Anthropicକମ୍ପାନୀର ଅତ୍ୟାଧୁନିକ କୃତ୍ରିମ ବୁଦ୍ଧିମତା (AI) ମଡେଲ Claude Mythos 5ର ସୀମିତ ବ୍ୟବହାରକୁ ଅନୁମତି ଦେଇଛି । ଜାତୀୟ ସୁରକ୍ଷା ଆଶଙ୍କା ଦର୍ଶାଇ ଚଳିତ ମାସ ଆରମ୍ଭରେ ଏହି ମଡେଲର ବ୍ୟବହାର ଉପରେ ରୋକ ଲଗାଯାଇଥିଲା । ବର୍ତ୍ତମାନ ଅତିରିକ୍ତ ସୁରକ୍ଷା ବ୍ୟବସ୍ଥା ଲାଗୁ କରିବା ପରେ ସରକାର ସୀମିତ ଆକାରରେ ଏହାକୁ ପୁଣି ଚାଲୁ କରିବାକୁ ସବୁଜ ସଙ୍କେତ ଦେଇଛି ।
ନୂତନ ଅନୁମତି ଅନୁଯାୟୀ, ୧୦୦ରୁ ଅଧିକ ବିଶ୍ୱସ୍ତ ଆମେରିକୀୟ ସଂସ୍ଥା, ବିଶେଷକରି ସାଇବର ସୁରକ୍ଷା ସଂଗଠନ ଏବଂ ଗୁରୁତ୍ୱପୂର୍ଣ୍ଣ ଭିତ୍ତିଭୂମି (Critical Infrastructure) ସହ ଜଡ଼ିତ ସଂସ୍ଥାଗୁଡ଼ିକୁ Mythos 5 ବ୍ୟବହାର କରିବାର ସୁଯୋଗ ମିଳିବ । ଏହି ସଂସ୍ଥାଗୁଡ଼ିକ AI ମଡେଲକୁ ସାଇବର ଆକ୍ରମଣ ଚିହ୍ନଟ, ସୁରକ୍ଷା ଦୁର୍ବଳତା ଖୋଜିବା ଏବଂ ଜାତୀୟ ଡିଜିଟାଲ ସୁରକ୍ଷାକୁ ସୁଦୃଢ଼ କରିବାରେ ବ୍ୟବହାର କରିବେ ।
ଆମେରିକାର ବାଣିଜ୍ୟ ସଚିବ Howard Lutnick କହିଛନ୍ତି ଯେ Anthropic ଆବଶ୍ୟକ ସୁରକ୍ଷା ବ୍ୟବସ୍ଥାକୁ ଶକ୍ତିଶାଳୀ କରିଛି । ଏହାପରେ ସରକାର ନିଷ୍କର୍ଷରେ ପହଞ୍ଚିଛି ଯେ ବିଶ୍ୱସ୍ତ ସଂଗଠନମାନଙ୍କୁ ଏହି AI ମଡେଲ ବ୍ୟବହାର କରିବାର ଅନୁମତି ଦିଆଯାଇପାରିବ । ତେବେ ସରକାର ସ୍ପଷ୍ଟ କରିଛି ଯେ ପରିସ୍ଥିତି ବଦଳିଲେ ଏହି ଅନୁମତିର ସର୍ତ୍ତ ମଧ୍ୟ ପରିବର୍ତ୍ତନ ହୋଇପାରେ ।
Anthropic ପକ୍ଷରୁ କୁହାଯାଇଛି ଯେ କମ୍ପାନୀ ଅନୁମୋଦିତ ସଂସ୍ଥାଗୁଡ଼ିକୁ ଶୀଘ୍ର Mythos 5 ଉପଲବ୍ଧ କରାଇବା ପାଇଁ କାମ କରୁଛି । ସେହିସହିତ କମ୍ କ୍ଷମତାସମ୍ପନ୍ନ Fable 5 ମଡେଲକୁ ପୁଣି ସାଧାରଣ ବ୍ୟବହାର ପାଇଁ ଉପଲବ୍ଧ କରାଇବାକୁ ସରକାର ସହ ଆଲୋଚନା ଜାରି ରହିଛି ।
ଉଲ୍ଲେଖଯୋଗ୍ୟ ଯେ, ଜୁନ୍ ୧୨ରେ ଆମେରିକା ସରକାର Mythos 5 ଓ Fable 5 ଉପରେ ରୋକ ଲଗାଇଥିଲା । ଆଶଙ୍କା ଥିଲା ଯେ ଏହି ଶକ୍ତିଶାଳୀ AI ମଡେଲଗୁଡ଼ିକୁ ହ୍ୟାକର କିମ୍ବା ବିଦେଶୀ ବିରୋଧୀ ଶକ୍ତି ଦୁରୁପଯୋଗ କରିପାରନ୍ତି । ଏହି ଘଟଣା ପରେ ଆମେରିକା ସରକାର ଅତ୍ୟାଧୁନିକ AI ମଡେଲ ଉପରେ ଅଧିକ କଠୋର ନିୟନ୍ତ୍ରଣ ଆରମ୍ଭ କରିଛି । ଏହି ପରିପ୍ରେକ୍ଷୀରେ ଅନ୍ୟ AI କମ୍ପାନୀମାନେ ମଧ୍ୟ ନିଜର ନୂତନ ମଡେଲକୁ ପର୍ଯ୍ୟାୟକ୍ରମେ ରୋଲଆଉଟ୍ କରୁଛନ୍ତି ।
