ପୁରୀ, ଓଡ଼ିଶା: ବିଶ୍ୱପ୍ରସିଦ୍ଧ ବାଲୁକା ଶିଳ୍ପୀ Sudarsan Pattnaik ପୁଣିଥରେ ଭାରତ ଓ ଓଡ଼ିଶାର ଗୌରବ ବଢ଼ାଇଛନ୍ତି । ସେ ରୁଷିଆର କାଲିନିନଗ୍ରାଡ୍ରେ ଆୟୋଜିତ ଦ୍ୱିତୀୟ ଆନ୍ତର୍ଜାତୀୟ ବାଲୁକା ଶିଳ୍ପ ଉତ୍ସବରେ Russian Grand Sand Master Cup 2026 ଜିତି ପ୍ରଥମ ଭାରତୀୟ ଭାବେ ଏହି ସମ୍ମାନ ହାସଲ କରିଛନ୍ତି ।
ସୁଦର୍ଶନ ପଟ୍ଟନାୟକ ତାଙ୍କ ବିଜୟୀ ବାଲୁକା ଶିଳ୍ପ ମାଧ୍ୟମରେ ଜଳବାୟୁ ପରିବର୍ତ୍ତନ ଓ ବିଶ୍ୱ ଉଷ୍ମତାଭଳି ଗୁରୁତ୍ୱପୂର୍ଣ୍ଣ ବିଶ୍ୱ ସମସ୍ୟାକୁ ଉପସ୍ଥାପନ କରିଥିଲେ । ତାଙ୍କ କଳାକୃତିର ସାମାଜିକ ବାର୍ତ୍ତା ଓ ନିଖୁଣ କାରିଗରୀ ବିଚାରକମାନଙ୍କୁ ମୁଗ୍ଧ କରିଥିଲା ।
ପୁରୀର ଏକ ସାଧାରଣ ପରିବାରରେ ଜନ୍ମିତ ସୁଦର୍ଶନଙ୍କ ଜୀବନ ଯାତ୍ରା ସଂଘର୍ଷମୟ ଥିଲା । ଶୈଶବରେ ଖାଦ୍ୟ ପାଇଁ ଅନ୍ୟମାନଙ୍କ ଘରେ ଛୋଟମୋଟ କାମ କରିବାକୁ ପଡ଼ୁଥିଲା। କିନ୍ତୁ ତାଙ୍କ ଅଦମ୍ୟ ଇଚ୍ଛାଶକ୍ତି ଓ କଳାପ୍ରତି ନିଷ୍ଠା ତାଙ୍କୁ ବିଶ୍ୱସ୍ତରରେ ପରିଚିତ କରାଇଛି ।
୨୦୧୪ ମସିହାରେ ଭାରତ ସରକାର ତାଙ୍କୁ ପଦ୍ମଶ୍ରୀ ସମ୍ମାନରେ ସମ୍ମାନିତ କରିଥିଲେ । ସେ ୬୫ରୁ ଅଧିକ ଆନ୍ତର୍ଜାତୀୟ ପ୍ରତିଯୋଗିତାରେ ଭାଗ ନେଇ ଅନେକ ପୁରସ୍କାର ଜିତିଛନ୍ତି ।
ଏହି ସଫଳତା ଓଡ଼ିଶାର କଳା ଓ ସଂସ୍କୃତିକୁ ବିଶ୍ୱମଞ୍ଚରେ ଆଉ ଏକ ନୂଆ ପରିଚୟ ଦେଇଛି ।
