ଭୁବନେଶ୍ୱର, ୧୭ ଅକ୍ଟୋବର; ଦେଶରେ ଧନ୍ଦାମୂଳକ ଶିକ୍ଷା ଓ ଦକ୍ଷତା ବିକାଶ ବ୍ୟବସ୍ଥାକୁ ଅଧିକ ଆଧୁନିକ ଏବଂ ଶିଳ୍ପଭିତ୍ତିକ କରିବା ଦିଗରେ କେନ୍ଦ୍ର ସରକାର ଆଉ ଏକ ପଦକ୍ଷେପ ନେଇଛନ୍ତି। ଓଡ଼ିଶା, ମହାରାଷ୍ଟ୍ର ଓ ଜାମ୍ମୁ-କାଶ୍ମୀରର ପାଞ୍ଚଟି ଶିଳ୍ପ ତାଲିମ ପ୍ରତିଷ୍ଠାନ (ITI) କ୍ଲଷ୍ଟରର ଉନ୍ନତିକରଣ ପାଇଁ ମୋଟ ₹୧,୧୯୪.୯୨ କୋଟିର ରଣନୈତିକ ନିବେଶ ଯୋଜନାକୁ ଅନୁମୋଦନ ମିଳିଛି। ୧୬ ଅକ୍ଟୋବର ୨୦୨୬ରେ ଅନୁଷ୍ଠିତ ଷଷ୍ଠ ଜାତୀୟ ଷ୍ଟିୟରିଂ କମିଟି ବୈଠକରେ ଏହି ନିଷ୍ପତ୍ତି ହୋଇଥିବା କେନ୍ଦ୍ର ସରକାରଙ୍କ ପ୍ରେସ୍ ଇନଫର୍ମେସନ୍ ବ୍ୟୁରୋ (PIB) ପ୍ରକାଶ କରିଛି।
ଏହି ଅନୁମୋଦନ ଅନୁଯାୟୀ, ଓଡ଼ିଶାର କଟକ ITI କ୍ଲଷ୍ଟର ପାଇଁ ₹୨୪୦.୫୦ କୋଟିର ନିବେଶ ଯୋଜନା ଅନୁମୋଦିତ ହୋଇଛି। ଏହି ପ୍ରକଳ୍ପ ଟାଟା ଷ୍ଟିଲ୍ ଫାଉଣ୍ଡେସନ୍ର ସହଭାଗିତାରେ କାର୍ଯ୍ୟକାରୀ ହେବ। ଏହି କ୍ଲଷ୍ଟରରେ କଟକ ସରକାରୀ ITI ମୁଖ୍ୟ ପ୍ରତିଷ୍ଠାନ ବା ହବ୍ ଭାବେ କାର୍ଯ୍ୟ କରିବ। ଚୌଦ୍ୱାରର ମଧୁସୂଦନ ସରକାରୀ ITI ସମେତ ପାରାଦୀପ, ଯାଜପୁର ଓ ଢେଙ୍କାନାଳର ସରକାରୀ ITI ଗୁଡ଼ିକୁ ସଂଯୁକ୍ତ ପ୍ରତିଷ୍ଠାନ ବା ସ୍ପୋକ୍ ଭାବେ ସାମିଲ କରାଯାଇଛି।
ଏହି ପ୍ରକଳ୍ପର ଲକ୍ଷ୍ୟ ହେଉଛି ତାଲିମ ଭିତ୍ତିଭୂମିର ଉନ୍ନତି, ନୂତନ ପିଢ଼ିର ଦକ୍ଷତାଭିତ୍ତିକ ପାଠ୍ୟକ୍ରମ ପ୍ରଚଳନ ଏବଂ ଶିଳ୍ପ ସଂସ୍ଥା ସହ ତାଲିମ ପ୍ରତିଷ୍ଠାନଗୁଡ଼ିକର ସମ୍ପର୍କକୁ ସୁଦୃଢ଼ କରିବା। ମହାରାଷ୍ଟ୍ରର ପୁଣେ ITI କ୍ଲଷ୍ଟର ପାଇଁ ₹୨୪୧ କୋଟି ଏବଂ ଛତ୍ରପତି ସମ୍ଭାଜୀନଗର ITI କ୍ଲଷ୍ଟର ପାଇଁ ₹୨୩୮.୦୧ କୋଟି ଅନୁମୋଦନ କରାଯାଇଛି। ପୁଣେ କ୍ଲଷ୍ଟରରେ BVG ଇଣ୍ଡିଆ ଲିମିଟେଡ୍ ଓ ଛତ୍ରପତି ସମ୍ଭାଜୀନଗର କ୍ଲଷ୍ଟରରେ ବେଲରାଇଜ୍ ଇଣ୍ଡଷ୍ଟ୍ରିଜ୍ ଲିମିଟେଡ୍ ସହଭାଗୀ ହେବେ।
ସେହିପରି, ଜାମ୍ମୁ ITI କ୍ଲଷ୍ଟର ପାଇଁ ₹୨୪୦ କୋଟି ଏବଂ ଶ୍ରୀନଗର ITI କ୍ଲଷ୍ଟର ପାଇଁ ₹୨୩୫.୪୧ କୋଟିର ନିବେଶ ଯୋଜନା ଅନୁମୋଦନ ହୋଇଛି। ଏହି ଦୁଇଟି ପ୍ରକଳ୍ପରେ ଯଥାକ୍ରମେ ଇଗଲ୍ ଇନଫ୍ରା ଇଣ୍ଡିଆ ଓ ଇନ୍ଦରଦୀପ ଇନଫ୍ରା ଇଣ୍ଡିଆ ସହଭାଗୀ ହେବେ।
ପ୍ରଧାନମନ୍ତ୍ରୀ ସ୍କିଲିଂ ଆଣ୍ଡ ଏମ୍ପ୍ଲୟାବିଲିଟି ଟ୍ରାନ୍ସଫର୍ମେସନ୍ ଥ୍ରୁ ଅପଗ୍ରେଡେଡ୍ ITIs (PM-SETU) ହେଉଛି ସରକାରୀ ITI ବ୍ୟବସ୍ଥାର ଗୁଣବତ୍ତା ଓ ପ୍ରାସଙ୍ଗିକତା ବଢ଼ାଇବା ପାଇଁ ଏକ ଜାତୀୟ ଯୋଜନା। ଏହାର ମୋଟ ଆର୍ଥିକ ବ୍ୟୟବରାଦ ₹୬୦,୦୦୦ କୋଟି। ଏଥିରେ କେନ୍ଦ୍ର ସରକାରଙ୍କ ଅଂଶ ₹୩୦,୦୦୦ କୋଟି, ରାଜ୍ୟ ସରକାରଙ୍କ ଅଂଶ ₹୨୦,୦୦୦ କୋଟି ଏବଂ ଶିଳ୍ପ ସଂସ୍ଥାଗୁଡ଼ିକର ଅଂଶ ₹୧୦,୦୦୦ କୋଟି ରହିଛି।
ଯୋଜନାର ପ୍ରଥମ ଭାଗରେ ହବ୍-ଆଣ୍ଡ-ସ୍ପୋକ୍ ମଡେଲ୍ରେ ୧,୦୦୦ ସରକାରୀ ITIର ଉନ୍ନତିକରଣ ପ୍ରସ୍ତାବ ରହିଛି। ଦ୍ୱିତୀୟ ଭାଗରେ ପାଞ୍ଚଟି ଜାତୀୟ ଦକ୍ଷତା ତାଲିମ ପ୍ରତିଷ୍ଠାନ (NSTI)ର କ୍ଷମତା ବୃଦ୍ଧି ଓ ପ୍ରଶିକ୍ଷକମାନଙ୍କ ଉନ୍ନତ ତାଲିମ ଉପରେ ଗୁରୁତ୍ୱ ଦିଆଯାଇଛି।
