ଦିଲ୍ଲୀ: NEET-UG 2026 ପୁନଃପରୀକ୍ଷାକୁ ସୁରକ୍ଷିତ, ସ୍ୱଚ୍ଛ ଓ ନିର୍ବିଘ୍ନ ଭାବେ ଆୟୋଜନ କରିବା ପାଇଁ ଜାତୀୟ ପରୀକ୍ଷା ଏଜେନ୍ସି (NTA) ଜୁନ 20 ତାରିଖରେ ଦେଶବ୍ୟାପୀ ମକ୍ ଡ୍ରିଲ୍ ଆୟୋଜନ କରିଛି। ଜୁନ 21ରେ ହେବାକୁ ଥିବା ପୁନଃପରୀକ୍ଷା ପୂର୍ବରୁ ସମସ୍ତ ପରୀକ୍ଷା କେନ୍ଦ୍ରର ପ୍ରସ୍ତୁତି, ସୁରକ୍ଷା ବ୍ୟବସ୍ଥା ଓ ପ୍ରଶାସନିକ ସମନ୍ୱୟକୁ ପରୀକ୍ଷା କରିବା ହେଉଛି ଏହି ମକ୍ ଡ୍ରିଲ୍ର ମୁଖ୍ୟ ଉଦ୍ଦେଶ୍ୟ।
ଏପରିସ୍ଥିତିରେ ଓଡ଼ିଶା ସରକାର ଓ ଓଡ଼ିଶା ପୁଲିସ ମଧ୍ୟ ପରୀକ୍ଷାକୁ ନେଇ ବ୍ୟାପକ ସୁରକ୍ଷା ବ୍ୟବସ୍ଥା କରିଛନ୍ତି। ରାଜ୍ୟର 27ଟି ଜିଲ୍ଲାରେ ଥିବା 132ଟି ପରୀକ୍ଷା କେନ୍ଦ୍ରରେ କଡ଼ା ନଜର ବ୍ୟବସ୍ଥା କରାଯାଇଛି। ଓଡ଼ିଶା ପୁଲିସର ଆଇନ-ଶୃଙ୍ଖଳା ଅତିରିକ୍ତ ମହାନିର୍ଦ୍ଦେଶକ (ADG) ସଞ୍ଜୟ କୁମାର କହିଛନ୍ତି ଯେ କେନ୍ଦ୍ର ଓ ରାଜ୍ୟ ସରକାରଙ୍କ ସ୍ପଷ୍ଟ ନିର୍ଦ୍ଦେଶ ରହିଛି—ପରୀକ୍ଷାରେ କୌଣସି ପ୍ରକାର ଅନିୟମିତତା, ଦୁର୍ନୀତି କିମ୍ବା ବାଧା ସୃଷ୍ଟିର ସମ୍ଭାବନାକୁ ସମ୍ପୂର୍ଣ୍ଣ ଭାବେ ଦୂର କରାଯିବ।
ପ୍ରଶ୍ନପତ୍ରଗୁଡ଼ିକ ନିର୍ଦ୍ଦିଷ୍ଟ ସୁରକ୍ଷିତ ସ୍ଥାନରେ ପହଞ୍ଚିସାରିଛି ଏବଂ ସେଗୁଡ଼ିକର ସୁରକ୍ଷା ପାଇଁ ପୁଲିସ ଓ କେନ୍ଦ୍ରୀୟ ସଶସ୍ତ୍ର ବଳ (CAPF) ମୁତୟନ କରାଯାଇଛି। ପ୍ରତ୍ୟେକ ପରୀକ୍ଷା କେନ୍ଦ୍ରରେ ସୁରକ୍ଷା ଅଡିଟ୍ କରାଯାଇଥିବା ବେଳେ ଜ୍ୟେଷ୍ଠ ଅଧିକାରୀଙ୍କୁ ନୋଡାଲ୍ ଦାୟିତ୍ୱ ଦିଆଯାଇଛି। ରାଜ୍ୟର ସମସ୍ତ ଜିଲ୍ଲା ପ୍ରଶାସନକୁ ମଧ୍ୟ ସତର୍କ ରହିବାକୁ କୁହାଯାଇଛି।
NTA ପକ୍ଷରୁ ମଧ୍ୟ ପରୀକ୍ଷା ପରିଚାଳନା ପାଇଁ ବିଶେଷ ପରାମର୍ଶ ଜାରି କରାଯାଇଛି। ପରୀକ୍ଷାର୍ଥୀମାନଙ୍କୁ ନୂଆ ଆଡମିଟ୍ କାର୍ଡ ବ୍ୟବହାର କରିବା, ସମୟ ପୂର୍ବରୁ କେନ୍ଦ୍ରରେ ପହଞ୍ଚିବା ଏବଂ କେବଳ ଅଧିକୃତ ସୂଚନା ଉପରେ ଭରସା କରିବାକୁ କୁହାଯାଇଛି। ପରୀକ୍ଷା ସମ୍ପର୍କିତ ଅପଡେଟ୍ ପାଇଁ NTA ଏକ ଅଧିକୃତ WhatsApp ଚ୍ୟାନେଲ୍ ମଧ୍ୟ ଆରମ୍ଭ କରିଛି।
ଗତ କିଛି ମାସ ଧରି NEET ପ୍ରଶ୍ନପତ୍ର ଲିକ୍ ଅଭିଯୋଗକୁ ନେଇ ସାରା ଦେଶରେ ବିବାଦ ଚାଲିଥିବାରୁ ଏଥର ପରୀକ୍ଷା ପାଇଁ ଅଭୂତପୂର୍ବ ସୁରକ୍ଷା ବ୍ୟବସ୍ଥା କରାଯାଇଛି। କେନ୍ଦ୍ର ସରକାର, ରାଜ୍ୟ ସରକାର ଓ ଜିଲ୍ଲା ପ୍ରଶାସନ ମିଳିତ ଭାବେ ପରୀକ୍ଷାର ସ୍ୱଚ୍ଛତା ଓ ବିଶ୍ୱସନୀୟତା ରକ୍ଷା ପାଇଁ କାମ କରୁଛନ୍ତି। କ୍ୟାବିନେଟ ସଚିବ ଟି.ଭି. ସୋମନାଥନ ମଧ୍ୟ ପ୍ରସ୍ତୁତି ସମୀକ୍ଷା କରି କହିଛନ୍ତି ଯେ ପରୀକ୍ଷାରେ କୌଣସି ପ୍ରକାର ହସ୍ତକ୍ଷେପ କିମ୍ବା ଅନିୟମିତତା ସହ୍ୟ କରାଯିବ ନାହିଁ।
